Xitay péshqedem démokratning xongkongni ziyaret qilishigha yol qoydi

Roytérs agéntliqining béyjingdin bergen xewiridin melum bolushiche, xitay péshqedem démokrat rén wendingning xongkongni ziyaret qilishigha ruxset qildi.

Xitay da'irilirining bu xil herikiti kishilerni heyran qaldurghan bolup, beziler "bu démokratiyining xitayda asta- asta bash kötürüshi " dep qarisa, yene beziler " xitayning bundaq qilishining arqida choqum bir gep bar, shundaqla buni kéler yili béyjingda échilidighan olimpik yighini bilen choqum munasiwetlik dep qarashqa bolidu" dep körsetmekte.

Bu yil 62 yashqa kirgen rén wending roytérs muxbirlirigha özining kéler düshenbe küni ayali jang féngyin bilen birlikte yolgha chiqmaqchi boluwatqanliqini sözlep kélip "men xitay hökümitining bu qétim méning xongkongni ziyaret qilishimgha ruxset qilghanliqini oylisam, peqetla ishen'güm kelmeywatidu. Belkim ular pat arida béyjingda échilidighan olimpik yighinining héchqandaq tosalghusiz échilishini pilanlap, mushu qarargha kelgen bolushi mumkin" dep bildürdi.

Péshqedem démokrat rén wending 1979 ‏- yili " xitay xelqining bayanati " namliq kitabni yazghanliqtin hem yene 1989 - yilidiki tyen'enmin oqughuchilar herikitige qatniship, xitay démokratlar birleshmisini pilanlighanliqtin deslepte 4 yil, kéyin 7 yil türmide yatqan. U türmidin chiqqandin kéyinmu yenila qattiq nazaret astida yashap kelgen. (Méhriban)