Xristiyan muxlisi Uyghur élide bixeterlik xadimliri teripidin urup yarilanduruldi‎

Uyghur élining qeshqer wilayitidiki xristiyan muriti tung chimyaw yéqinda diniy étiqadi ‎sewebidin yerlik dölet bixeterlik idarisi xadimliri teripidin soraqqa tartilip, urup ‎yarilanduruldi.‎

Amérikidiki xitaygha yardem bérish jem'iyitining ashkarilishiche, qeshqer wilayetlik ‎dölet bixeterlik idarisining xadimliri 9 - ayning axirliri xristiyan muriti tungni soraqqa ‎tartip, uning qaysi yerde diniy yighilish ötküzidighanliqi, kimler bilen alaqisi barliqini ‎qistap sorighan. Tung so'allirigha jawab bermigenliktin, bixeterlik xadimliri uni urup ‎meyde söngikini sunduriwetken. ‎

Buningdin sirt, uning yarisi eslige kelmigen shara'itta, u dawaliniwatqan qeshqer ikkinchi ‎xelq doxturxanisi uning doxturxanidin chiqip kétishini telep qilghan. Uning qeshqer j x ‎idarisigha sun'ghan erzimu aqmighan. ‎

Shuning bilen bir waqitta, qeshqer baj da'iriliri tung chimyawni qeshqerdiki a'ile jihaziliri ‎dukinini 14 - öktebirgiche taqashqa buyrighan. Uning dilosi chet'el metbu'atlirining ‎diqqitini tartqandin kéyin, qeshqer bixeterlik da'iriliri yene uni ezeldin qiyin- qistaqqa ‎élinmighanliq heqqidiki bir tilxetke qol qoyushqa mejburlighan. ‎

Xitaygha yardem bérish jem'iyitidiki bo shichuw ependining bildürüshiche, bu, xitay ‎hökümiti bu yil 6 - ayda yéngi diniy ishlar nizamnamisini yolgha qoyghandin buyan, ‎Uyghur élide ikkinchi qétim keng kölemde dindarlarni axturup tutqun qilip, munasiwetlik ‎kishilerni qiyin - qistaqqa alghanliqining bir misali iken. ‎

Nöwette xitaydiki ataqliq üch qanunshunas özlikidin tung ependige qanuniy jehettin ‎yitekchilik qilidighanliqini bildürmekte. (Arzu)‎