Xitayda xrist'anlar bilen bir chérkawni chéqiwetmekchi bolghan saqchilar arisida toqunush yüz berdi


2006.07.31

Sherqiy junggodiki bir sheherde 3000 dek xrist'an muriti bilen bu sheherdiki bir xrist'an chérkawini chéqiwetmekchi bolghan saqchilar arisida toqunush yüz bérip, az dégende 4 kishi éghir derijide yarilandi.

Junggo démokratiye we kishilik hoquq merkizining xewer qilishiche, ötken shenbe küni saqchilar xangjuning shyawshen rayonidiki bir xrist'an chérkawini chéqiwetmekchi bolup barghan we bu chérkawda ibadet qilidighan 3000 dek xitay xrist'an muxlisining qarshi turushigha uchrighan. Chérkaw qarshiliqqa qarimay chéqiwétilgen bolsimu, lékin bu jeryanda éghir we yénik derijide bolup 20 kishi yarilan'ghan.

Birleshme axbarat agéntliqining eskertishiche, shyawshen rayonidiki bir saqchi xadimi bu chérkawni " qanunsiz sélin'ghan bina" örüwétldi, dep chüshendürgen, lékin ismini ashkarilashni we weqe toghrisida tepsiliy toxtilishni ret qilghan. " Xangju géziti" "qanunsiz sélin'ghan bir binaning" chéqiwétilgenlikini xewer qilghan bolsimu, lékin xrist'anlar bilen saqchilar arisida toqunush yüz bergenlikini tilgha almidi. "Xangju géziti" bu heqtiki xewiride " az sandiki bir türküm küshkürtishke uchrighan kishiler junggo qanunigha xilap halda sélin'ghan bu chérkawni qoghdimaqchi boldi," deydu.

Lékin junggo démokratiye we kishilik hoquq uchur merkizining eskertishiche, chérkawni chéqiwétish buyruqi bu yil 6 - ayda ölkilik hökümet we diniy ishlar idarisi chiqarghan " qanunsiz diniy qurulushlarni chéqiwétish " toghrisidiki höjjet boyiche élip bérilghan. (Erkin)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.