Xitay yer asti diniy teshkilat ezaliridin 15 kishige mexpi ölüm jazasi berdi

Birleshme agéntliqining béyjingdin xewer qilishiche, xéylungjyang ölkisidiki 'senbenpurin' dégen a'iliwiy dini teshkilatning murtliri sendung, jyangshi, sichu'en qatarliq 7 ölkige tereqqi qilip sani 500 minggha yetkende, xitay jama'et xewpsizlik minisitirliqi 2004 ‏- yili bu teshkilatning 20 neper ezasi üstidin 'adem öltürgen', 'aldamchiliq qilghan' dégen jinayi nam bilen sotqa shikayet sun'ghan.

Xewerde bayan qilinishiche, gerche xéylungjyangdin 20 nechche adwokat béyjingge kélip bu teshkilatni aqlap kéliwatqan bolsimu, emma hazirgha bu diny teshkilatning ezaliridin yushurun halda ölüm jazasigha hökum qilip ijra qilin'ghan adem sani 15 ke yetken. Xéylungjyang ölkisi shu'angyangsen sheherlik ottura sotning bu diniy teshkilatning ezaliri üstidin chiqarghan hökümliri buyil 10 ‏- ayning 17 ‏- künidin 19 ‏- künigiche, xéylungjyang ölkilik aliy sot mehkimisi teripidin qaytidin qarap chiqilghan bolsimu yenila özgirish bolmighan.

Xewerde bayan qilinishiche, xitay kommunistik partiyisining kontrolluqidiki katolik wetenperwerler teshkilati teripidin 'qanunsiz yer asti teshkilat ' dep qariliwatqan rim papasigha chuqunidighan diniy teshkilatlarning ezaliri hazir xitayda 12 milyon'gha yetti. Xitay kommunist hökümiti özi étirap qilmaydighan xrist'an teshkilatlirining hemmisini izchil halda basturup kelmekte.(Weli)