Хитай дөләтлик дора вә йемәк-ичмәкләрни назарәт қилиш вә башқуруш идарисиниң башлиқи өлүмгә һөкүм қилинди


2007-05-29
Share

Хитай дөләтлик дора вә йемәк-ичмәкләрни назарәт қилиш идарисиниң башлиқи җең шавйү сәйшәнбә күни парихорлуқ қатарлиқ җинайәтләр билән өлүмгә һөкүм қилинди . Сот униңға сәккиз хил парихорлуқ җинайити вә үч хил хизмәткә етибарсиз қараш җинайити артқан.

Шинхуа агентлиқиниң учуриға қариғанда , җең шавйүниң парихорлуқ йоли билән еришкән мал-дунясиниң омумий қиммити алтә милйон 490 миң йүән әтрапида болуп , бу қетим униң барлиқ мал-мүлки мусадирә қилинған һәмдә сиясий һоқуқидин өмүрвайәт мәһрум қилинған . Хәвәрләргә асасланғанда, җең шавйү сотта өзиниң җинайитини етирап қилған болсиму, лекин, " хизмәткә етибарсиз қараш җинайити"ни қобул қилишни рәт қилған.

Б б с агентлиқиниң учуридин қариғанда, җең шавйү сот җәрянида көп қетим хитай дөләтлик дора вә йемәк-ичмәк идарисиниң дориларға рухсәт бериш башқармисиниң сабиқ башлиқи сав венҗуаңни тилға алған болуп , бу адәм 2002-йили җең шавйүниң катиплиқ вәзиписиниму беҗиргән. У, 2006-йили мәркизи интизам тәкшүрүш комитети тәрипидин җазаланғанда, җең шавйүниң парихорлуқини паш қилған. Ениқлинишичә, сав венҗуаң хитай бойичә рухсәт қилинған 170 миң дора тәстиқлаш номуриниң 150 миңини өзи беҗиргән икән. Ашкарилинишичә, әмдики сот нөвити сав венҗуаңға кәлгән.

Өлүмгә һөкүм қилинған җең шавйүниң аяли вә оғлиму парихорлуқ билән әйибләнгән болсиму, бирақ улар үстидин җең шавйү билән бирликтә шикайәт қилинмиған һәмдә униң аяли қоюп берилгән .

Хитай дөләтлик дора вә йемәк -ичмәкләрни назарәт қилиш һәм башқуруш идарисиниң башлиқи җең шавйү өлүмгә һөкүм қилиништин илгири америка билән хитай арисида иқтисадий истратегийә сөһбити болуп өткән һәмдә америка бир қисим хитай дора вә йемәк - ичмәклириниң өлчәмгә лайиқ әмәсликини елан қилған иди. Җең шавйүниң өлүм җазасиниң елан қилиниши билән охшаш вақитта йәнә хитай мәһсулатларни қайтуруш түзүми қоллинидилиғанлиқини елан қилди.

Җең шавйү йеқинқи йиллардин буян парихорлуқ билән өлүмгә һөкүм қилинған әң юқири дәриҗилик әмәлдарлардин болуп һесаблиниду. (Үмидвар)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт