Xitaydiki bir doxturxanida yüz bergen partlashta 27 kishi öldi

Xitayning senshi ölkisining yüenping shehiridiki bir doxturxanida düshenbe küni etigen partlash yüz bérip, az dégende 27 kishi qaza qildi. Shundaqla hazirghiche yene bir qanche kishining iz-dériki tépilmighanliqi melum bolmaqta.

Roytérs agéntliqining xewirige qarighanda, bu partlash shüen'gang kömür-éléktir cheklik shirkitining ishchi-xizmetchiler doxturxanisidiki yer asti mashina zalida yüz bergen bolup, partlash sewebidin bu yerdin 1 kilométir yiraqliqqiche bolghan jaylardiki qurulushlar melum derijide weyran bolghan. Bolupmu doxturxanining yénidiki 5 qewetlik a'ililikler binasi bir qeder éghir ziyan'gha uchrighan.

Hazirghiche bu partlashning kélip chiqish sewebi téxiche aydinglashmighan. Munasiwetlik orunlar hazir bu heqte tekshürüsh élip barmaqta. Buning bilen bir waqitta qutquzush ishlirimu jiddiy élip bériliwatqan bolup, ölüm-yitim ehwalining yene köpiyishi mumkinliki mölcherlenmekte.

Xitayda yéqinqi bir nechche yillardin buyan mushuninggha oxshash partlash we ot kétish hadisliri bir qeder köp yüz bermekte. Ötken yili dékabirda jilin ölkiside yüz bergen bir ot kétish weqesidimu doxturxanidiki 39 neper bimar qaza qilghan idi.