Xitay bash teptishi, mehbuslarni qiynap iqrar qildurushni toxtitishni telep qildi

Xitay metbu'atlirining xewer qilishiche, xitay ali teptish mehkimisining mu'awin bash teptishi chyu shöchyang, saqchilarni qanunsiz usullar bilen mehbuslarni qiynap iqrar qildurushni toxtitishqa chaqirdi. Chyu shöchyang, mehbuslarni qiynap iqra qildurush, qanunning adalitige kölengge chüshüridighan jiddi mesililerni keltürüp chiqarmaqta, dep eyipligen. Chyu shöchyang bu sözlerni peyshenbe küni béyjingda memliketlik teptishler yighinida qildi.

Xelq'ara kishilik hoquq organliri xitayda mehbuslargha ten jazasi bérish omumiyüzlük ehwal, dep tenqidlimekte idi. Xitayda ayalini öltürüsh bilen eyiblinip türmige tashlan'ghan bir er kishi ayalining hazirgha qeder hayat ikenliki bayqalghandin kéyin qoyup bérilgen. U, bu jeryanda 11 yil türmide yatqan bolup, saqchilarning jismaniy qéyin - qistaqlirigha chidimighan gumandar, ayalimni öltürdüm, dep yalghandin iqrar qilghan. Emma eyni chaghda uning ayali bashqilar bilen qéchip ketken iken. Bu weqe xitayda keng ghul - ghula qozghighan idi.

Buningdin sirt Uyghur aptonom rayonida 2000 - yili saqchilar qazaqistan da'iriliri teripidin xitaygha tapshurup bérilgen zulpiqar muhemmetni qiynap iqrar qildurghan. U, sot mehkimiside jinayiti ret qilip, saqchilar üstidin shikayet qilghan bolsimu, emma sot mehkimisi uni ölüm jazasigha höküm qilghan idi. (Erkin)