Хитай әдлийә сестимиси кишилик һоқуқ тәшкилатлириниң тәнқидигә учриди


2006.12.01

Җүмә күни хитайниң бейҗиң шәһири вә сәндуң өлкисидики икки сот мәһкимиси америка "ню - йорк вақти" гезитиниң тәтқиқатчиси җав йән вә әма кишилик һоқуқ паалийәтчиси чен гуаңчиңниң дилоси үстидин айрим - айрим һөкүм елан қилип, улар үстидин чиқирилған әслидики һөкүмни күчкә игә, дәп җакарлиди.

Сәндуң өлкиси линйий шәһәрлик сот мәһкимиси илгири чен гуаңчиңни кишиләрни пиланлиқ туғут сияситигә қарши күшкүртүш, җамаәт мал- мүлкигә зиян селиш билән әйибләп, 4 йиллиқ қамақ җазасиға һөкүм қилған болсиму, лекин өлкилик юқири сот мәһкимиси давани қайта көрүп чиқишқа буйруған.

Линйий шәһәрлик сот мәһкимиси әслидики һөкүмни сақлиди. Шу күни бейҗиң шәһәрлик юқири сот мәһкимиси " ню - йорк вақти" гезитиниң тәтқиқатчиси җав йәнгә шәһәрлик оттура сот мәһкимиси тәрипидин берилгән 3 йиллиқ қамақ җазасини күчкә игә, дәп һөкүм қилди.

Бейҗиң шәһәрлик 2 - оттура сот мәһкимиси бу йил 8 - айда җав йәнни 3 йиллиқ қамақ җазасиға һөкүм қилғандин кейин, у һөкүмгә қайил болмай юқири сот мәһкимисигә әрз қилған. Бу икки мәһкумниң адвокатлири уларни "гунаһсиз" дәп ақлиди вә сот һөкүмини "адаләтсиз" дәп әйиблиди.

Хәлқара кишилик һоқуқ тәшкилатлири болса хитай әдлийә сестимисини тәнқидлимәктә. Мәркизи ню - йорктики кишилик һоқуқни көзитиш тәшкилатиниң тәтқиқатчиси мекий спейгил, хитай сот мәһкимилириниң һөкүмини "қол ишаритигә қарап хәт тепиш оюни" дәйду. У, "бу адаләт әмәс, сиясәт" дәп көрсәтти. (Әркин)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.