Xitay edliye séstimisi kishilik hoquq teshkilatlirining tenqidige uchridi

Jüme küni xitayning béyjing shehiri we sendung ölkisidiki ikki sot mehkimisi amérika "nyu - york waqti" gézitining tetqiqatchisi jaw yen we ema kishilik hoquq pa'aliyetchisi chén gu'angchingning dilosi üstidin ayrim - ayrim höküm élan qilip, ular üstidin chiqirilghan eslidiki hökümni küchke ige, dep jakarlidi.

Sendung ölkisi linyiy sheherlik sot mehkimisi ilgiri chén gu'angchingni kishilerni pilanliq tughut siyasitige qarshi küshkürtüsh, jama'et mal- mülkige ziyan sélish bilen eyiblep, 4 yilliq qamaq jazasigha höküm qilghan bolsimu, lékin ölkilik yuqiri sot mehkimisi dawani qayta körüp chiqishqa buyrughan.

Linyiy sheherlik sot mehkimisi eslidiki hökümni saqlidi. Shu küni béyjing sheherlik yuqiri sot mehkimisi " nyu - york waqti" gézitining tetqiqatchisi jaw yen'ge sheherlik ottura sot mehkimisi teripidin bérilgen 3 yilliq qamaq jazasini küchke ige, dep höküm qildi.

Béyjing sheherlik 2 - ottura sot mehkimisi bu yil 8 - ayda jaw yenni 3 yilliq qamaq jazasigha höküm qilghandin kéyin, u hökümge qayil bolmay yuqiri sot mehkimisige erz qilghan. Bu ikki mehkumning adwokatliri ularni "gunahsiz" dep aqlidi we sot hökümini "adaletsiz" dep eyiblidi.

Xelq'ara kishilik hoquq teshkilatliri bolsa xitay edliye séstimisini tenqidlimekte. Merkizi nyu - yorktiki kishilik hoquqni közitish teshkilatining tetqiqatchisi mékiy spéygil, xitay sot mehkimilirining hökümini "qol isharitige qarap xet tépish oyuni" deydu. U, "bu adalet emes, siyaset" dep körsetti. (Erkin)