Xitay hökümiti yaponiyining telipini ret qildi

Yaponiye tashqi ishlar ministiri machimura yekshenbe küni béyjinggha yitip kélip, xitayda bir nechche heptidin buyan dawamliship kéliwatqan yaponiyige qarshi zorawanliq weqelirige qarshi qattiq naraziliq bildürdi.

U sözide, "yéqinqi zorawanliq heriketler we yaponiyige qarshi keypilatlar kishini epsuslanduridighan weziyetni keltürüp chiqardi. Biz xitay rehberlirining semimiy bolushini we waqtida tedbir élishini ümid qilimiz" dédi. U yene xitay hökümitining yaponiyidin epu sorishini telep qildi.

Biraq xitay tashqi ishlar ministiri li jawshing uning telipini ret qilip, " bu xil weziyetlerning kélip chiqishining mes'uliyiti yaponiye terepte" dédi. Li jawshingning bildürüshiche, xitay hökümiti ezeldin yaponiye hökümitidin epu sorighidek ish qilip baqmighan iken. Bu yerdiki asasliq mesile, yaponiye , teywen mesilisi, kishilik hoquq we tarixiy mesililerde xitay puqralirining héssiyatini aghritqan iken.

Nöwette yaponiye- xitay munasiwiti nechche on yildin buyanqi eng yirik mezgilge qedem qoydi. Bu arida, yaponiyining iqtisad ministiri, özlirining xitay terepning sherqiy junggo déngizidiki yaponiyige tewe iqtisadiy rayon etrapida tebi'iy gaz qédirish ishlirini élip bérish mesilisini xelq'ara sotqa sunushi mumkinlikini bildürdi.

Xitay hökümitining sherqiy junggo déngizidiki üch orunda tebi'iy gaz bayliqini qédirish programmisini bashlishi, yaponiyining qattiq naraziliqini qozghighan. Shuning bilen bir waqitta, yaponiye hökümitining ötken hepte bir yapon shirkitige bu rayondiki néfit we tebiy gazni sinaq yosunda échish hoquqini bergenliki, yaponiye we xitay munasiwitini téximu jiddiyleshtürgen idi. (Arzu)