Әрз сунғучилар, давамлиқ түрдә бейҗиңға кәлмәктә

Бейҗиңда хитай хәлқ қурултийи ечиливатқан бир пәйттә, хитайниң һәр қайси җайлиридин миңлиған, он миңлиған деһқанлар, хизмәттин бошутулған ишчилар вә мәҗбурий көчүрүлгән аһалиләр бейҗиңға келип, хитай хәлқ қурултийиниң уларниң мәсилисини һәл қилип беришини үмид қилмақта. Әмма хитай һөкүмити болса, бир қисим әрз сунғучиларни давамлиқ тутқун қилмақта.

Америка бирләшмә ахбарат агентлиқиниң бир нәпәр хенәндин кәлгән ишчиниң сөзини нәқил кәлтүрүшичә, у хенәндә сақчилар тәрипидин таяқ йигән болуп, гәрчә йәрлик һөкүмәткә әрз сунған болсиму, бирақ йәрлик һөкүмәт даирилири униң әрзини аңлимиған. Бу сәвәбтин у хитай хәлқ қурултийиниң әрзини бир тәрәп қилип беришини үмид қилип, бейҗиңға кәлгән.

Бирақ америка бирләшмә ахбарат агентлиқниң ейтишичә, у вә униңға охшаш нурғун әрздарлар тутқун қилиниш вә яки өз юртиға қайтурулуш тәғдиригә дүч кәлмәктә.

Хитай мәркизи һөкүмити бу йил 1 - айда мәхсус уқтуруш чиқирип, һәр қайси йәрлик һөкүмәтләрдин хәлқләрниң әрзлирини бир тәрәп қилип, әрздарларниң бейҗиңға йиғилишиниң алдини елишни тәләп қилған. Буниң билән һәр қайси йәрлик органлар икки йиғин мәзгилидә бейҗиңға адәм әвәтип, йәрлик әрздарларниң йолини тосқан, һәтта уларни мәҗбурий юртиға қайтурған.

Буниңдин сирт хитай һөкүмити йәнә йеқинда нурғун әрздарларни тутқун қилип, уларниң икки йиғин җәрянидики иш- һәрикәтлирини чәкләшкә урунған. Буларниң ичидә шаңхәйдики мәҗбурий көчүрүлгәнләр үчүн адвокатлар қилип қолға елинған җи инлоңниң аяли, "чимиң" тор бетиниң башқурғучиси ли җйәнхуң қатарлиқлар бар икән. (Арзу)