Erz sun'ghuchilar, dawamliq türde béyjinggha kelmekte

Béyjingda xitay xelq qurultiyi échiliwatqan bir peytte, xitayning her qaysi jayliridin minglighan, on minglighan déhqanlar, xizmettin boshutulghan ishchilar we mejburiy köchürülgen ahaliler béyjinggha kélip, xitay xelq qurultiyining ularning mesilisini hel qilip bérishini ümid qilmaqta. Emma xitay hökümiti bolsa, bir qisim erz sun'ghuchilarni dawamliq tutqun qilmaqta.

Amérika birleshme axbarat agéntliqining bir neper xénendin kelgen ishchining sözini neqil keltürüshiche, u xénende saqchilar teripidin tayaq yigen bolup, gerche yerlik hökümetke erz sun'ghan bolsimu, biraq yerlik hökümet da'iriliri uning erzini anglimighan. Bu sewebtin u xitay xelq qurultiyining erzini bir terep qilip bérishini ümid qilip, béyjinggha kelgen.

Biraq amérika birleshme axbarat agéntliqning éytishiche, u we uninggha oxshash nurghun erzdarlar tutqun qilinish we yaki öz yurtigha qayturulush teghdirige düch kelmekte.

Xitay merkizi hökümiti bu yil 1 - ayda mexsus uqturush chiqirip, her qaysi yerlik hökümetlerdin xelqlerning erzlirini bir terep qilip, erzdarlarning béyjinggha yighilishining aldini élishni telep qilghan. Buning bilen her qaysi yerlik organlar ikki yighin mezgilide béyjinggha adem ewetip, yerlik erzdarlarning yolini tosqan, hetta ularni mejburiy yurtigha qayturghan.

Buningdin sirt xitay hökümiti yene yéqinda nurghun erzdarlarni tutqun qilip, ularning ikki yighin jeryanidiki ish- heriketlirini chekleshke urun'ghan. Bularning ichide shangxeydiki mejburiy köchürülgenler üchün adwokatlar qilip qolgha élin'ghan ji inlongning ayali, "chiming" tor bétining bashqurghuchisi li jyenxung qatarliqlar bar iken. (Arzu)