3 Нәпәр әрздар хитай соти тәрипидин җазаға тартилди

Истансимизниң игилишичә, бу йил 6 ‏- айда шаңхәйдә өткүзүлгән "6 тәрәп сөһбити" дин бурун қолға елинған 3 нәпәр һоқуқ қоғдуғучиси сәйшәнбә күни хитай соти тәрипидин сотланған.

Җоңгу кишилик һоқуқ тәшкилатиниң билдүришичә, шаңхәйлик һоқуқ қоғдуғучи әрздарлардин тән бавчең, ду яңмиң вә ваң шуйҗен қатарлиқ 3 киши, сот тәрипидин " қәстән қалаймиқанчилиқ туғдурған " дегән җинайәт билән әйиблинип, айрим ‏- айрим 2 йерим йиллиқ вә бир йиллиқ қамақ җазасиға һөкүм қилинған. Тән бавчеңниң аяли җаң суйпиң, хитайда иқтисадий ислаһат елип беришта йеңилиқ яратқан хитай рәһбири җав зияңниң дәпнә мурасимиға қатнашқанлиқи үчүн, бир йерим йиллиқ әмгәк билән өзгәртиш җазасиға тартилған.

Хәвәрләргә қариғанда, ду яңмиң 60 нәччә яшқа киргән болуп, у һөкүмәтниң мәҗбурий өйдин көчүрүш сәвәбидин, узун йиллардин бери көп қетим һөкүмәткә әрз сунған, бу түпәйли 3 қетим қолға елинип, бир йерим йил әмгәк билән өзгәртиш җазсиға учриған. Нөвәттә түрмә сақчилири ду яңмиңниң һәр кесәлләргә гириптар болишиға қаримай уни қаттиқ қийин - қистаққа вә еғир әмгәккә салмақта.

Ваң шуйҗенму, 2003 ‏- йили "қәстән қалаймиқанчилиқ туғдурған" дегән җинайәт билән икки йил түрмидә ятқан.

Мәркизи нйо-йорктики җоңгу кишилик һоқуқ тәшкилати, шаңхәй сот даирилириниң, әрздарлар һоқуқини дәпсәндә қилиш қилмишини қаттиқ әйибләп, уларни дәрһал қоюп беришини тәләп қилди.

Хитайда һөкүмәтниң йолсиз сиясити түпәйли, наразлиқ билдүргичиләрниң сани күндин - күнгә көпәймәктә. (Әқидә)