3 Neper erzdar xitay soti teripidin jazagha tartildi

Istansimizning igilishiche, bu yil 6 ‏- ayda shangxeyde ötküzülgen "6 terep söhbiti" din burun qolgha élin'ghan 3 neper hoquq qoghdughuchisi seyshenbe küni xitay soti teripidin sotlan'ghan.

Jonggu kishilik hoquq teshkilatining bildürishiche, shangxeylik hoquq qoghdughuchi erzdarlardin ten bawchéng, du yangming we wang shuyjén qatarliq 3 kishi, sot teripidin " qesten qalaymiqanchiliq tughdurghan " dégen jinayet bilen eyiblinip, ayrim ‏- ayrim 2 yérim yilliq we bir yilliq qamaq jazasigha höküm qilin'ghan. Ten bawchéngning ayali jang suyping, xitayda iqtisadiy islahat élip bérishta yéngiliq yaratqan xitay rehbiri jaw ziyangning depne murasimigha qatnashqanliqi üchün, bir yérim yilliq emgek bilen özgertish jazasigha tartilghan.

Xewerlerge qarighanda, du yangming 60 nechche yashqa kirgen bolup, u hökümetning mejburiy öydin köchürüsh sewebidin, uzun yillardin béri köp qétim hökümetke erz sun'ghan, bu tüpeyli 3 qétim qolgha élinip, bir yérim yil emgek bilen özgertish jazsigha uchrighan. Nöwette türme saqchiliri du yangmingning her késellerge giriptar bolishigha qarimay uni qattiq qiyin - qistaqqa we éghir emgekke salmaqta.

Wang shuyjénmu, 2003 ‏- yili "qesten qalaymiqanchiliq tughdurghan" dégen jinayet bilen ikki yil türmide yatqan.

Merkizi nyo-yorktiki jonggu kishilik hoquq teshkilati, shangxey sot da'irilirining, erzdarlar hoquqini depsende qilish qilmishini qattiq eyiblep, ularni derhal qoyup bérishini telep qildi.

Xitayda hökümetning yolsiz siyasiti tüpeyli, narazliq bildürgichilerning sani kündin - kün'ge köpeymekte. (Eqide)