Xitayda 50 milyon adem eydiz bilen yuqumlinish xewpide yashawatidu

Xitay hökümiti peyshenbe küni xitayda eydiz wirusining tarqilish sür'iti astilighanliqini, lékin 2007 - yili eydiz yuqumdarlirining 700 minggha yetkenlikini élan qilip bir kün ötkendin kéyin, b d t xadimliri jüme küni 50 milyon xitay puqrasi eydiz bilen yuqumlinish xewpi astida yashawatqanliqini agahlandurdi.

B d t eydiz programmisining maslashturghuchi emeldari bérnxard shwartlendir dunya eydiz künidin bir kün burun élan qilghan bayanatida " bügün ottuz milyondin ellik milyon'ghiche bolghan xitay puqrasi eydiz wirusi bilen yuqumlinish tehditi astida yashawatidu. Bu , mesilining yoshurun xewpi we éghirliqini namayen qilmaqta" dep körsetti.

Xitay sehiye ministiri chén ju peyshenbe küni xitayda eydiz wirusining tarqilish sür'iti astilighanliqini eskertip, 2007 - yili 50 ming kishining eydiz wirusida yuqumlan'ghanliqini, buning bilen xitayda eydiz bilen yuqumlan'ghuchilarning omumi sani 700 minggha chiqqanliqini ilgiri sürgen. Bechchiwazliq 2007 - yili xitayda eydiz wirusi tarqilishtiki eng muhim qanalgha aylan'ghan bolup, shu yili %44 adem eydiz wirusini mushu yollar bilen yuqturuwalghan.

B d t emeldari shwartlendir,xitayda " eydiz wirusining yoshurun xewpi nahayiti éghir ikenlikini tonup yétishimiz kérek " dep agahlandurdi. Xitayda eydiz wirusi keng tarqalghan rayonlar yünnen, gu'angshi, gu'angdung, xubéy we Uyghur ilini öz ichige alidu. Lékin bu jaylar ichide Uyghur ili eydizning tarqilish sür'iti eng téz jay bolup, " tengritagh tori " ning eskertishiche, Uyghur ili bu yil eydiz bilen yuqumlan'ghuchilarning sani jehette 4 - orundin 2 - orun'gha chiqqan. (Erkin)