Xitay da'iriliri eydiz bimarliri hoquqini qoghdighuchi zat xu jyani resmiy eyiblidi

Xitay edliye da'iriliri xitaydiki eydiz bimarliri hoquqini qoghdighuchi meshhur zat xu jyani " dölet hakimiyitige qarshi ighwagerchilik qilish" jinayiti bilen resmiy eyiblidi. Xu jyaning adwukati li fangpingning jüme küni ashkarilishiche, xitay saqchi da'iriliri xu jyaning qanunda belgilen'gen tutup turulush waqti toshushtin burun, ötken seyshenbe küni uni resmiy qolgha alghan hem xu jyaning ayali zéng jinyen'ge qolgha élish uqturushini tapshurghan.

Xu jya, ötken yili 12 - ayning 27 - küni saqchilar teripidin tutup kétilgendin kéyin, uning ayali zéng jinyen we quchaqtiki bowiqi a'iliside nezerbent qilin'ghan idi. Saqchilar peyshenbe küni xu jyaning ata- anisini oghli bilen körüshtürgen bolsimu, lékin uning adwukatlirining xu jya bilen körüshüshige hazirgha qeder ruxset qilmidi. Xu jya eydiz bimarliri hoquqini qoghdighuchi zat süpitide nam chiqiripla qalmay, u yene puqralarning öy - mülük hoquqini qoghdash we tor bétide xitay hökümitini tenqid qilidighan maqalilerni yézish bilen nam chiqarghan hem 2007 - yili yawropa ittipaqining "saxarow" tinchliq mukapatigha érishken idi.

Xu jyaning qolgha élinishi gherb elliride küchlük inkas qozghighan bolup, amérika tashqi ishlar ministirliqi xu jyaning qolgha élinishidin bi'aram bolghanliqini bildürgen, yawropa parlaménti qarar maqullap uni derhal qoyuwétishini telep qilghan. Xu jyaning qolgha élin'ghan waqti xelq'ara jem'iyet xitayni béyjing olimpik musabiqisi yétip kélishtin burun, kishilik hoquq xatirisini yaxshilashqa ündewatqan mezgilge toghra keldi. Shu tüpeyli bu weqe gherb döletliri we kishilik hoquq teshkilatlirining diqqitini qozghimaqta idi. (Erkin)