Amérika elchisi xitayni ammiwi teshkilatlarni basturush bilen eyiblidi

Amérikining xitayda turushluq bash elchisi klark randt, seyshenbe küni béyjing da'irilirining xitaydiki hökümetke béqinmaydighan ammiwi teshkilatlargha cheklime qoyghanliqini eyiblep, xitayning kishilik hoquq xatirisini yaxshilashqa chaqirdi.

Klark randt, xongkongda amérikiliq karxanichilargha " biz intérnét yollanmilirigha qoyulghan cheklime we hökümetke béqinmaydighan ammiwi teshkilatlarni basturush herikitidin bi'aram boluwatimiz," dep tekitligen.

Kishilik hoquq teshkilatliri xitayni emgek we siyasi aktiplar, terepsiz diniy guruhlarni basturush bilen eyiblimekte. Amérika emeldarliri béyjing da'irilirining amérika prézidént bush ötken ayda xitayni ziyaret qilishtin burun öktichilerni nezerbend qilghanliqidin narazi bolghan idi.

Emma xitay hökümiti özini "puqralarning turmush shara'itini yuqiri kötürüp, kishilik hoquqni yaxshilawatimiz," dep aqlimaqta. Klark randt, "kishilik hoquqni depsende qilish xitayda yenila köp uchraydighan mesile," deydu. Uning tekitlishiche, xitayda qolgha élish, tutqun qilish, muxbirlarni türmige solash, dindarlar we ilmiy xadimlar hakimiyetni aghdurush, dölet mexpiyetlikini ashkarilash dégendek namlar bilen jazalanmaqta.

Randt, béyjingning muqimliqqa ehmiyet béridighanliqini chüshinimen, dep tekitligen bolsimu, emma u, béyjing memliket ichidiki hökümetke béqinmaydighan ammiwi teshkilatlarni basturupla qalmay, chet'el teshkilatlirighimu guman bilen qaraydu, dep eskertken. (Erkin)