Xitay kompartiyisining sabiq emeldarliri xitayning metbu'at kontrolluqini eyiblidi


2006.02.15

Xitay kompartiyisining bir qisim yuqiri derijilik sabiq emeldarliri we ziyalilar yéqinda birleshme bayanat élan qilip, xitay hökümitining metbu'at erkinlikige bolghan kontrolluqini eyiblidi.

Amérika birleshme agéntliqining melum qilishiche, bu birleshme bayanatni pénsiyige chiqqan 13 neper péshqedem kompartiye ezaliri yézip chiqqan bolup, bularning arisida maw zédongning sabiq katipi li rüy, xitay kompartiyisining sabiq teshwiqat ministiri ju zéxu we shinxu'a agéntliqining sabiq bashliqi li pu qatarliqlar bar iken.

Ularning bu bayanati charshenbe küni metbu'atqa ashkarilan'ghan bolup, ular bayanatta xitay hökümitining metbu'atqa bolghan kontrolluqini eyiblesh bilen birge, xu jintaw hökümitini asasiy qanun'gha xilap halda qanunsiz élip bériwatqan xelqning söz erkinlikni bundaq boghush herikitini derhal toxtitishqa chaqirghan.

Mezkur bayanatta, " xitay kompartiyisining teshwiqat ministirliqi 'teshwiqat' sözini 'kontrol qilish' menisige ishlitiwaldi" dep yézilghan. Uningda yene, xitay hökümitining xelqning köz qarishini kontrol qilish meqstide, puqralarning söz erkinlikini boghush, qara tizimlikke élish we mexpiy tekshürüsh élip bérishqa oxshash asasiy qanun'gha xilap heriketlerni qilghanliqi eyiblen'gen hemde "bu heriketler, qanun da'irisidin tamamen halqighan, qopal we bimene heriketlerdur" dep körsitilgen.

Bu bayanat asasliqi, yashlar gézitining " bingdyen" dep atalghan heptilik sanining ötken ayda xitay hökümiti teripidin taqiwétilgenlikige narazi bolup chiqirilghan. Xitaydiki oqurmenlerning chong alqishigha érishken bu gézit, jem'iyettiki mesililerni jür'etlik bilen pash qilghanliqi bilen dang chiqarghan idi. (Peride)

Pikir qoshung

Radi'oning ishlitish shertlirige asasen, pikirliringiz tekshürgüchiler teripidin testiqlinishi we muwapiq derijide tehrirlinishi tüpeyli, tor bette derhal peyda bolmaydu. Siz qaldurghan mezmun'gha erkin asiya radi'osi jawabkar bolmaydu. Bashqilarning köz qarishi we heqiqetke hörmet qilishingizni soraymiz.