Falün'gung muritliri xitayni kishilik hoquqini yaxshilashqa chaqirdi

Xitay hökümiti teripidin cheklen'gen falün'gung herikitining muritliri grétsiyige olimpik yighini échilishining harpisida bayanat élan qilip, xitay hökümitini 2008 - yili olimpik yighini ötküzüshtin burun kishilik hoquqini yaxshilashqa chaqirdi.

Falün'gung muritliri, grétsiyining paytexti afina shehiridiki muxbirlar kütüwelish yighinida élan qilghan bayanatida, xitay hökümitining olimpik rohigha xilapliq qiliwatqanliqini eyiplidi. Yawrupadiki falün'gung uyushmisining mes'uli wu winshin muxbirlargha "olimpik bayriqi uzun ötmey xitaygha tapshurulidu. Biraq xitay eng asasi kishilik hoquqqimu xilapliq qiliwatqan dölet, shunga xitayda olimpik yighini échilghiche bolghan kéyinki töt yil ichide, xelqara jem'iyet choqum xitayning kishilik hoquqqa hörmet qilishigha kapaletlik qilishi kérek" didi.

Ikki grétsiyilik falün'gung muriti yene , xitaydiki jiyang zémin we li liyenching qatarliq xitay rehberliri üstidin grétsiye sot mehkimisige erz sun'ghan. Emma afinadiki xitay elchixanisi xitay rehberlirining olimpik musabiqisi üchün grétsiyige kélidighanliq xewirining yoqliqini bildürgen. 2004 - Yilliq olimpik tenterbiye musabiqisi 8 - ayning 13 - künidin 29 - künigiche grétsiyide ötküzülidu.

Buningdin sirt, xelqara tibet herikitini qollash tori teshkilatimu xelqara olimpik komitétini, xitayning 2008 - yilliq olimpik musabiqisini ötküzüshi üchün, kishilik hoquq shertini qoshushqa chaqirdi.(Arzu)