Хитай, фалунгуң һәрикитиниң инсан организими тиҗарити һәққидики баянлирини рәт қилди

Хитай һөкүмити сәйшәнбә күни түрмидә өлтүрүлгән фалунгуң муритлириниң ички организимини сетиш содисиға арилашқанлиқини вә бу содини қоллиғанлиқини рәт қилди. Лекин өлүм җазаси иҗра қилинған мәһбусларниң ички организимини көчүрүш вәқәлири "бир қанчә дило" билән чәклинидиғанлиқини әскәртти.

Фалунгоңниң америкида нәшр қилинидиған "йеңи ера гезити ," шиняң шәһиридики суҗятун әмгәк билән өзгәртиш лагириға 6000 нәпәр фалунгуң муритиниң қамалғанлиқини вә бу лагирдики нурғун кишиләрниң өлтүрүлгәндин кейин ички организими чиқиривелинип җәсиди бузғунчилиққа учриғанлиқини илгири сүргән.

Фалунгуң тәриқити 90 - йилларда хитай бойичә мода еқимға айланған болсиму, лекин бейҗиң һөкүмити 1999- йили бу тәриқәтни хурапий мәзһәп, дәп чәклигәндин кейин хитай бойичә бастурулуш обиктиға айланди. Б д т кишилик һоқуқ кеңишиниң тән җазасини тәкшүрүш бойичә алий дәриҗилик назарәтчиси манфрид новакниң йеқинда елан қилған доклатида әскәртишичә, фалунгуң муритлири уйғур, тибәт қатарлиқ милләтләр қатарида хитай әдлийә даирилириниң тән җазаси билән қийнайдиған обиктилириниң бири болуп қалған.

Лекин, чин гаң фалунгуңниң бу баянлирини "җаваб беришкә әрзимәйдиған бимәнә ялғанчилиқ вә һечким буниңға ишәнмәйду " деди. Хитайда һәр йили өлүм җазаси иҗра қилинидиған мәһбуслар сани, дуня бойичә өлүм җазасиға һөкүм қилинған кишиләрниң омуми санидин нәччә һәссә көп, дәп қаралмақта. Хитай мутәхәссислириниң пәрәз қилишичә, хитайда һәр йили өлүм җазаси берилип иҗра қилинидиған кишиләр 10 миңға йетиши мүмкин. Әмма кишилик һоқуқ тәшкилатлири бу санниң 15 миңға йетидиғанлиқини пәрәз қилишмақта. (Әркин)