Xitay falun'gongchilarning ichki ezalirini sétish heqqidiki eyibleshlerni ret qildi

• 
  2006-04-12

Xitay hökümiti falun'gong ezalirining ichki ezalirini sétish heqqidiki eyibleshlerni küchlük ret qildi. Xitayning lyawning ölkilik sehiye idarisi emeldari bu heqtiki bayanlarning pütünley oydurma ikenlikini bildürdi.

Falun'gong teshkilatliri yéqinda bayanat élan qilip, nechche ming falun'gong ezalirining lyawning ölkisidiki bir doxturxanigha solan'ghanliqini, bu doxturxanining falun'gongchilar üchün bir "yighiwélish lagiri" bolup qalghanliqini bildürgen. Shundaqla bu doxturxanilarning bu falun'gongchilarning ichki ezalirini sétish ishliri bilen shoghullan'ghanliqini éytqan idi.

Lyawning ölkisining shényang sheherlik doxturxana xadimi buninggha reddiye bérip, bu rayonda ademlerning ichki ezalirini yötkesh opiratsiyisi yoq bolupla qalmay, hetta bu xil opiratsiyisini qilidighan eslihelerningmu yoqliqini bildürgen. Xitayning shinxu'a agéntliqi bu heqtiki xewiride, chet'ellerdiki falon'gongchilarning 3‏-aydin bashlap bu xil söz-chöcheklerni tarqitip kéliwatqanliqini, shundaqla buning emeliyetke qet'iy uyghun kelmeydighanliqini körsetken.

Falun'gongchilarning xitaygha qaratqan bu heqtiki eyibleshliride, bu yerdiki doxturxanigha solan'ghan 6 minggha yéqin falun'gongchilarning xitay hökümitining tejribe obiktigha aylan'ghanliqi hemde ichki ezalirini ishlitip bolghan falun'gong ezalirining jesitini köydürüp yoq qilghanliqini eskertilgen. Birleshken döletler teshkilatining qiyin-qistaq ishlirigha qarshi bölümining bashliqi noyak ependi, ularning hazir bu heqte tekshürüsh élip bériwatqanliqini bildürdi.