Foshendiki saqchilar bilen déhqanlar otturisidiki toqunushta 50 nechche kishi yarilandi

6‏- April küni gu'angdungdiki 2000 din oshuq déhqan saqchilarning déhqanlar rehberlirini qolgha alghanliqigha naraziliq bildürüp yighilish ötküzdi. Netijide yighilishtiki déhqanlar bilen saqchilar toqunushup qélip, az dégende 50 neper déhqan yarilan'ghan.

Erkin asiya radi'osi muxbirining igiligen uchurigha qarighanda, weqe yüz bergen gu'angdungning foshen rayonluq saqchi idarisi bu namayishchilargha taqabil turush üchün 2000 gha yéqin saqchini neq meydan'gha ewetken. Saqchilar toqunushtin kéyin yene 10 gha yéqin kishini qolgha alghan.

Ismini ashkarilashni xalimighan bir déhqanning radi'omizgha bildürüshiche, hazir bu yézigha nurghun puqrache kiyin'gen saqchilar orunlashturulghan bolup, bu yerning weziyiti intayin jiddiy iken. Lékin déhqanlar emdi qorqup qalmaydighanliqini, yene dawamliq namayishqa chiqishni pilanlawatqanliqini bildürgen.

Yéza ahalilirining bu naraziliqi yéziliq hökümetning bu yerdiki 2000 modin oshuq yerni yéngi pen-téxnika sheherchisi qilip échish pilani sewebidin kélip chiqqan. Chünki bundaq bolghanda tériqchiliq bilen tirikchilik qilidighan bu yéza ahalilirigha 5/1 qisimdinmu az yer qalidiken.

Uning üstige déhqanlar yene, ularning yerliri üchün bérilgen tölem pullirighimu razi bolmighan. Hökümet her bir mo yer üchün 65 ming yüen pul bergen bolup, bu döletning tölem bérish ölchimidinmu töwen iken. Shu sewebtin déhqanlar bu yil 3‏-ayda 6 neper wekilini ikki yighin mezgilide erznamilirini sunush üchün béyjinggha ewetken. Lékin ularning üchi saqchilar teripidin qolgha élin'ghan.