Гирманийә парламенти башлиқиниң бейҗиңдики нутуқи, хитайни биарам қилди


2005.04.28

Тибәттики зияритини әмдила ахирлаштурған гирманийә парламентиниң башлиқи волифгаң сиәрис пәйшәнбә күни хитай компартийә мәктипидә сөзлигән нутуқида, японийини әйибләштин баш тартип, хитайдин өзиниң өтмүшигә тоғра муамилә қилишни тәләп қилди.

Әнгилийә б б с радио- телевизийә ширкитиниң хәвиригә қариғанда,униң сөзи хитай әмәлдарлирини интайин биарам қилған.

Хәвәрдә ейтилишичә, волифгаң сиәрис нутуқ сөзләш җәрянида, бир хитай компартийә әмәлдари униңдин, иккинчи дуня урушидин кейин германийиниң өз қилмишлиридин қаттиқ өкүнгәнликини, бирақ японийиниң бундақ қилишни рәт қиливатқанлиқиға қандақ қарайдиғанлиқини сориған.

Волифгаң сиәрис униңға җавабән, " һәр қандақ дөләт башқа дөләтләрниң өтмүштики җинайәтлиридин өз- өзини тәкшүрүшини тәләп қилишни халиса, алди билән өзи үлгә болуп, өзиниң өтмүшини обдан тәкшүрүши керәк" дегән.

У йәнә хитайни чоқум японийә билән сөһбәт өткүзүп, тарихи мәсилиләрни вә бир - биригә болған бир тәрәплимә қарашларни музакирә қилишқа чақирған.

Хәвәрдә анализчиларниң сөзини нәқил кәлтүрүшичә, германийә парламент башлиқиниң бу сөзлири, германийиниң йирақ шәрқтики муһим дөләтләрниң тоқунушида тәрәпсиз мәйданда турупла қалмастин, йәнә " кишилик һоқуқ" һәммидин үстүн туридиған дипломатийини йүргүзидиғанлиқини ипадиләйдикән. (Арзу)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.