Гоминдаң рәһбириниң бейҗиңдики зиярити тәйвәндә һакимийәт бешидики партийиниң тәнқидигә учриди

Хитай чоң қуруқлуқидики бәш күнлүк зияритини ахирлаштуруп, җүмә күни тәйвәнгә қайтқан гоминдаң партийисиниң муавин рәиси җаң бинкунниң хитай чоң қурулуқидики зиярити, тәйвән президенти чен шүйбйәнләрниң тәнқидигә үчриди.

Чен шүйбйән җүмә күни гоминдаң вәкилиниң тәйвәнгә вәкиллик қилалмайдиғанлиқини илгири сүргән. У, " тәйвәнниң өз дөлити бар, өз һөкүмити бар. Башқилар билән сөһбәт елип барғанда җидди вә сәзгүр мәсилиләрдә алди билән һөкүмәтниң йол қоюшини яки рухситини елиш керәк," дәп көрсәтти. Гоминдаңниң муавин рәиси җаң бинкун бәш күнниң алдида хитай чоң қуруқлуқини зиярәт қилип, хитай компартийисидики җя чиңлин, таң җяшуән қатарлиқ юқири дәриҗилик әмәлдарлар билән сөһбәт елип барған.

Гоминдаң партийисиниң муавин рәиси җаң бинкун, хитай дөләт кабинти тәйвән ишханисиниң мудири чен йүнлин билән, икки қирғақ мунасивити бойичә 10 нуқтилиқ ортақ тонуш һасил қилған. Хитай сияси мәслиһәт кеңишиниң рәиси җя чиңлин гоминдаң партийисиниң рәиси лйән җәнни хитайға тәклип қилған.

Тәйвәнниң муавин президенти лү шюлйән, гоминдаңни " тәйвән хәлқиғә йүз келәлмәйду," дәп әйиплиди. У, гоминдаңниң илгирики " компартийигә қарши туридиған" партийини " компартийәпәрәс" партийигә еғип кәткәнликини илгири сүргән. Чен шүйбйән, "һакимийәт сиртидики партийиниң һөкүмәт билән ортақ тонуши болмиса, гоминдаң - компартийә һәмкарлиқиниң әһмийити немә?" дәп соал қойған. Тәйвән чоң қурулуқ комитетитиму җүмә күни җаң бинкунниң зияритини ағмичилиқ билән әйиблигән. (Әркин)