Yershari xaraktérlik issip kétish xitayda ghelite hawa kilimati hasil qilmaqta

30 -Iyul düshenbe küni, xitay hawarayi aldin melum qilish tarmaqliri shangxeyning bu yil eng issiq yazni béshidin kechüridighanliqini melum qiliwatqan peytlerde xitayning bashqa jaylirida qurghaqchiliq we su apetliri yüz bermekte idi.

30 -Iyul küni, fransiye agéntliqi shangxey gézitidin neqil élip körsitishiche, shangxey shehirining aldinqi ikki künlük eng yuqiri témpératurisi 39.6 Sélsiye gradusqa örlep, tarixtiki eng yuqiri chekke yetken.

Junggo gézitining xewer qilishigha qarighanda, xitayning bashqa jaylirida qurghaqchiliq we kelkün apetliri izchil halda tehdit süpitide mewjud bolup turuwatqan bolup, xitay mutexessisler buni yershari xaraktérlik issip kétish hadisisi keltürüp chiqarghan dep otturigha qoyushmaqta.

Shuninggha yandashqan halda, hazir Uyghur élining altay rayonida uda nechche on kün dawamlashqan qurghaq kilimatning tesiride, altay wilayiti tewesidiki ulün'gür deryasida bir aydin buyan su toxtap qélish hadisisi kélip chiqqan.

Tengritagh tori 30- iyul bu heqte bergen xewerde mezkur "derya boyigha jaylashqan 350 ming mo yerdiki étizda hosul kémiyip kétish weziyiti muqimliship qaldi" dep körsitilgen bolup, melum bolushiche, ulün'gür derya wadisigha jaylashqan burultoqay nahiyiside tarixtin buyanqi eng éghir qurghaqchiliq hadisisi körün'gen.

Uning eksiche, aldinqi hepte Uyghur élining gherbiy qismida éghir kelkün apiti körülüp 90 adem jénidin ayrilghan , 20 nechche ademning izi-dériki bolmighan idi. (Jüme)