Tibetlerning nesli yoqilish aldidiki haywanlarni qoghdash herikiti béyjingni bi'aram qildi

Hindistanning daramsala rayonidiki tibet sergerdan hökümitining jüme küni tekitlishiche, nechche minglighan tibet puqrasi dalay lamaning nesli qurup kétish aldidiki yawayi haywanlarni qoghdash chaqiriqigha awaz qoshup, tibet aptonom rayonida haywan térilirini köydürüshke bashlighandin kéyin, xitay hökümiti bu herikettin bi'aram bolup hazirghiche 9 kishini qolgha alghan.

Birleshme axbarat agéntliqining tibet aptonom rayonida yawayi haywanlarni qoghdash herikitige qatnashqan kishilerdin neqil keltürüshiche, "sherqiy tibet rayonida 600 milyon yüenlik yawayi haywan térisi köydürüwétilgen " . Köydürüwétilgen haywan tériliri ichide yolwas, qaplan, qunduz qatarliq tibette köp uchraydighan qimmet bahaliq haywan tériliri bar. Lékin bu heriket xitay da'irilirini ghezeplendürgen.

Gérmaniyidiki tibet uchur torining xewer qilishiche, tibet puqraliri chingxeydiki kirti ibadetxanisining aldigha haywan térilirini toplap köydürmekchi bolghanda xitay da'iriliri yol qoymighan. Hindistandiki yawayi haywanlar hoquqini qoghdash teshkilatliri, bu jeryanda 9 kishining xitay da'iriliri teripidin qolgha élin'ghanliqini bildürdi. Bularning ikkisi xitay puqrasi iken. Tibet aptonom rayonidin daramsalagha qéchip barghan tibet rahibi lobsong chopél, " bu weqe biz üchün dunyagha bolupmu xitaygha tibetlerning dalay lamani qanchilik qollaydighanliqini körsitish jehette muhim ehmiyetke ige, " deydu.

Tibet aptonom rayonida dalay lamaning chaqiriqi bilen qozghalghan yawayi haywanlarni qoghdash herikiti, dalay lama wekillirining charshenbe küni xitayni ziyaret qilishqa bashlighan küni bilen oxshash bir waqitqa toghra keldi. (Erkin)