Тибәтләрниң нәсли йоқилиш алдидики һайванларни қоғдаш һәрикити бейҗиңни биарам қилди

• 
  2006-02-17

Һиндистанниң дарамсала районидики тибәт сәргәрдан һөкүмитиниң җүмә күни тәкитлишичә, нәччә миңлиған тибәт пуқраси далай ламаниң нәсли қуруп кетиш алдидики явайи һайванларни қоғдаш чақириқиға аваз қошуп, тибәт аптоном районида һайван терилирини көйдүрүшкә башлиғандин кейин, хитай һөкүмити бу һәрикәттин биарам болуп һазирғичә 9 кишини қолға алған.

Бирләшмә ахбарат агентлиқиниң тибәт аптоном районида явайи һайванларни қоғдаш һәрикитигә қатнашқан кишиләрдин нәқил кәлтүрүшичә, "шәрқий тибәт районида 600 милйон йүәнлик явайи һайван териси көйдүрүветилгән " . Көйдүрүветилгән һайван терилири ичидә йолвас, қаплан, қундуз қатарлиқ тибәттә көп учрайдиған қиммәт баһалиқ һайван терилири бар. Лекин бу һәрикәт хитай даирилирини ғәзәпләндүргән.

Германийидики тибәт учур ториниң хәвәр қилишичә, тибәт пуқралири чиңхәйдики кирти ибадәтханисиниң алдиға һайван терилирини топлап көйдүрмәкчи болғанда хитай даирилири йол қоймиған. Һиндистандики явайи һайванлар һоқуқини қоғдаш тәшкилатлири, бу җәрянда 9 кишиниң хитай даирилири тәрипидин қолға елинғанлиқини билдүрди. Буларниң иккиси хитай пуқраси икән. Тибәт аптоном районидин дарамсалаға қечип барған тибәт раһиби лобсоң чопел, " бу вәқә биз үчүн дуняға болупму хитайға тибәтләрниң далай ламани қанчилик қоллайдиғанлиқини көрситиш җәһәттә муһим әһмийәткә игә, " дәйду.

Тибәт аптоном районида далай ламаниң чақириқи билән қозғалған явайи һайванларни қоғдаш һәрикити, далай лама вәкиллириниң чаршәнбә күни хитайни зиярәт қилишқа башлиған күни билән охшаш бир вақитқа тоғра кәлди. (Әркин)