Yette döletning saqchi idare mes'ulliri, térorchiliqqa qarshi turush heqqide muzakire élip bardi

Xitay, rusiye, qazaqistan, qirghizistan, tajikistan, türkiye we özbékistan qatarliq yette döletning paytextlik saqchi idarisining mes'ulliri, 23 - noyabir küni béyjingda ötküzülgen xelq'ara térrorchiliqqa qarshi öz - ara hemkarlishish yighinigha qatnashti.

Bu qétimqi yighinni, béyjing sheherlik saqchi idarisi uyushturghan bolup, béyjing sheherlik saqchi idarisi bashliqining tonushturushiche, her qaysi döletlerning iqtisa'iy, medeniyet almashturushining chongqurlishishigha egiship, rayonning bixeterlikimu, hemkarlishishqa a'it muhim xizmetlerning birge aylan'ghan.

Bu qétimqi yighinda yette döletning saqchi da'irliri, térrorchiliqqa qarshi turush kürishi heqqide muzakire élip bérish bilen birge chégra atlap jinayet ötküzüsh, chong tiptiki pa'aliyetlerning bixeterliki qatarliq mesililer üstidimu pikir almashturghan.

Béyjing sheherlik saqchi idarisining bashliqi yene, 2008 - yili béyjingda ötküzülidighan olimpik tenterbiye musabiqisining bixeterlikige kapaletlik qilishning béyjing saqchiliri bash tartip bolmaydighan mes'uliyetlerning biri ikenlikini shuning bilen bir waqitta her qaysi döletlerning qollishigha muhtaj ikenlikini bildürgen.

Ikki kün dawamlishidighan bu yighinda yette döletning saqchi da'iriliri, dölet hemkarliqigha a'it birleshme höjjetke qol qoyidiken. (Eqide)