Rusiye, xitay we ottura asiya jumhuriyetlirining dölet mudapi'e ministirliri béyjingda jem boldi

Rusiye we ottura asiyadiki 4 jumhuriyetning dölet mudapi'e ministirliri seyshenbe küni atalmish térrorluq, diniy esebiylik we bölgünchilik mesilisini muzakire qilish üchün béyjingda jem boldi.

Xitay tashqiy ishlarministirliqi bayanatchisi chin gangning eskertishiche, shangxey guruhigha eza döletler mudapi'e ministirliri charshenbe küni "üch xil küchler" bilen küresh qilish mesilisi üstide muzakire élip baridiken.

Chin gang seyshenbe künki muxbirlarni kütüwélish yighinida " yighin jeryanida ministirlar rayon bixeterliki we üch xil küchlerge qarshi qandaq küresh qilish mesilisini muzakire qilidu " dédi. Uning eskertishiche, xitay dölet mudapi'e ministiri saw gu'angchüen yighin'gha riyasetchilik qilidiken. Xitay hökümiti, oxshimighan köz qarashtiki siyasiy , diniy zatlarni, öktichilerni we sherqiy türkistan döliti qurush terepdarlirini " diniy esebiy, bölgünchi we térrorchi " dep eyiblimekte. Lékin fransiye axbarat agéntliqi közetküchilerning shangxey guruhini amérikining afghanistan urushi jeryanida kücheygen rayondiki tesirige qarshi balanisni saqlash üchün qurulghan, dep qaraydighanliqini bildürdi.

Shangxey guruhi 1996 - yili rusiye, xitay, tajikistan, qirghizistan, qazaqistanlar teripidin qurulghan we özbékistan bu organ'gha 2001 - eza boldi. Shangxey guruhi 2005 - yili mayda özbékistan hökümitining enjandiki namayishni basturush herikitini qollighan bolsimu, lékin bu gherb elliri we xelq'ara kishilik hoquq teshkilatlirining shiddetlik tenqidige uchridi. (Erkin)