Ottura asiya elliri térrorluqqa qarshi ortaq heriket pilanini muzakire qilmaqta

Shangxey hemkarliq teshkilati bash katipi jang dégu'ang seyshenbe küni shangxey guruhigha eza döletler térrorluq tehditke qarshi ortaq heriket qollinish pilani üstide muzakire élip bériwatqanliqini bildürdi.

Jang dégu'angning eskertishiche, shangxey guruhining eza döletlerning ichkiy qisimidiki toqunushlargha arilishish niyiti bolmisimu, lékin eza döletler térorchi yaki diniy esebiy küchlerning tehditige uchrisa, uninggha qarshi ortaq heriket qollinish kélishimi üstide muzakire élip barmaqta iken. U, " biz ichki ishlargha arilashmasliq prinsipida qet'i ching turushimiz kérek. Lékin bu biz birleshme qoshun teshkillimeymiz we térrorchilarning hujumigha qarshi birleshme heriket élip barmaymiz dégenlik emes" deydu.

Jang dégu'ang, ichkiy toqunush bilen térrorluq hujumining chek -chégrisini qandaq ayriydighanliqini tilgha almidi. 2005 - Yili 5 - ayda özbékistan prézidénti kerimof, enjan weqesini basturghanda shangxey guruhidiki döletler kerimofni qollighan. Lékin amérika we xelq'ara kishilik hoquq teshkilatliri tashkent hökümitini eyibligen idi. Jang dégu'ang, shangxey hemkarliq teshkilati bashqa döletler bilen tirkishish yolini izdimeydu, dep tekitligen bolsimu, lékin közetküchiler rusiye bilen xitay bu teshkilatni amérikining rayondiki tesirige we shundaqla sherqiy türkistan küchlirige qarshi qollanmaqta, dep körsetti.

Shangxey guruhining kéler hepte shangxeyde chaqirilidighan bashliqlar yighinida iran, hindistan, pakistan we mongghuliyiler közetküchi dölet süpitide qatnishidiken. (Erkin)