Хитай 10 йилниң ичидә башқурулидиған бомбилирини техиму көпәйтиши мумкин

Бир нәпәр америка ахбарат хадими йеқинда, хитай һөкүмитиниң, америкиниң бу райондики тәсир күчигә тақабил туруш үчүн кәлгүсидики 10 йил ичидә йеңидин 3 хилдики истратегийилик башқурулидиған бомбиларни орунлаштуридиғанлиқини пәрәз қилди.

Ройтерс агентлиқиниң хәвиригә қариғанда, америка дөләтлик ахбарат комитетиниң рәиси дейвид горден бу пәрәзни сәйшәнбә күни америка һәрбий базилирини бирләштүрүш ишлириға мәсул комитетқа бәргән доклатида оттуриға қойған болуп, у йәнә, хитайниң йеңи башқурулидиған бомбиларни орунлаштуруш арқилиқ, тәйвән боғизидики күч тәңпуңлуқиға техиму чоң тәсир көрситидиғанлиқини билдүрди.

Горден мәзкур комитетта қилған сөзидә йәнә, истратегийилик һәрбий заманивилаштурушниң, хитай һөкүмитиниң нөвәттики асаслиқ нишани икәнликини, шундақла хитай кәлгүси 10 йилда орнатмақчи боливатқан бу башқурулидиған бомбилар, қитә-ара башқурулидиған бомба, балистик башқурулидиған бомба вә су асти парахотидин қоюп беридиған башқурулидиған бомба қатарлиқ 3 хилдики илғар бомбилар болуп, униң иқтидари вә күчи техиму илғар болидиғанлиқини билдүрди.

Униң ейтишичә, хитайниң һәрбий заманивилаштуруш пилани, икки қирғақниң күч тәңпуңлиқини бузупла қалмай, америка армийисниң бу райондики күчигиму тәсир көрситидикән.

Бу арида америка ақ сарай баянатчиси сәйшәнбә күнидики мухбирларни күтивелиш йиғинида, президент бушниң америкиниң һәр қандақ тәһдиткә тақабил туруш иқтидариниң барлиқиға толуқ ишинидиғанлиқини билдүрди. (Пәридә)