Xitay 10 yilning ichide bashqurulidighan bombilirini téximu köpeytishi mumkin

Bir neper amérika axbarat xadimi yéqinda, xitay hökümitining, amérikining bu rayondiki tesir küchige taqabil turush üchün kelgüsidiki 10 yil ichide yéngidin 3 xildiki istratégiyilik bashqurulidighan bombilarni orunlashturidighanliqini perez qildi.

Roytérs agéntliqining xewirige qarighanda, amérika döletlik axbarat komitétining re'isi déywid gordén bu perezni seyshenbe küni amérika herbiy bazilirini birleshtürüsh ishlirigha mes'ul komitétqa bergen doklatida otturigha qoyghan bolup, u yene, xitayning yéngi bashqurulidighan bombilarni orunlashturush arqiliq, teywen boghizidiki küch tengpungluqigha téximu chong tesir körsitidighanliqini bildürdi.

Gordén mezkur komitétta qilghan sözide yene, istratégiyilik herbiy zamaniwilashturushning, xitay hökümitining nöwettiki asasliq nishani ikenlikini, shundaqla xitay kelgüsi 10 yilda ornatmaqchi boliwatqan bu bashqurulidighan bombilar, qit'e-ara bashqurulidighan bomba, balistik bashqurulidighan bomba we su asti paraxotidin qoyup béridighan bashqurulidighan bomba qatarliq 3 xildiki ilghar bombilar bolup, uning iqtidari we küchi téximu ilghar bolidighanliqini bildürdi.

Uning éytishiche, xitayning herbiy zamaniwilashturush pilani, ikki qirghaqning küch tengpungliqini buzupla qalmay, amérika armiyisning bu rayondiki küchigimu tesir körsitidiken.

Bu arida amérika aq saray bayanatchisi seyshenbe künidiki muxbirlarni kütiwélish yighinida, prézidént bushning amérikining her qandaq tehditke taqabil turush iqtidarining barliqigha toluq ishinidighanliqini bildürdi. (Peride)