Teywen memuriy mehkimisi amérika bilen bolghan herbiy sodisini maqullidi

Xitay "döletni parchilashqa qarshi qanuni" ni maqullap 48 sa'ettin kéyin, teywen memuriy mehkimisi charshenbe küni teywenning amérikidin 15 yérim milyard dolliri qimmitide herbiy eslihelerni sétiwélishini maqullidi. Bu san esli layihide otturigha qoyulghan sanning 1/4 qismigha toghra kélidiken.

Teywen dölet mudapi'e ministirliqi ötken yili dékabirda xitayning tehditige taqabil turush we teywenning dölet mudapi'esini kücheytish üchün amérikidin qoral sétiwélish telep qilin'ghan bu layihini otturigha qoyghan idi. Bu layihe emdi parlaméntning maqullishigha sunulidiken.

Eger bu layihe maqullansa, teywen bu herbiy xirajet bilen amérikidin 6 dane bashqurulidighan bombigha qarshi sistémisi, 8 dane su asti paraxoti we su asti paraxotigha zerbe bergüchi ayrupilanlarni sétiwalidiken. Emma parlaméntta chén shüybyenning démokratiye ilgharliq partiyisige qarshi bolghan gomindang we chinmindang partiysidikiler köp sanliqni igiligechke, analizchilar bu layihining parlaménttin ötishige guman bilen qarimaqta.

Bu arida teywen prézidénti chén shüybyen, xitay xelq qurultiyi yéqinda maqullighan "döletni parchilashqa qarshi qanuni" gha naraziliq bildürüp, xitayning öz aldigha chiqiriwalghan tajawuzchiliq xaraktérdiki bundaq qanunining peqet ikki qirghaq weziyitini téximu jiddiyleshtüridighanliqini bildürdi. (Peride)