Xitay, herbiy qurulushining asiya bixeterlikige tehdit séliwatqanliqini ret qildi

Béyjing hökümiti, xitay herbiy küchining tereqqiyati asiyagha tehdit séliwatqanliqini tekitligen amérika dölet mudapi'e ministiri donald ramsfildning sözlirini " pütünley asassiz" dep eskertip, jonggoning herbiy küchler tereqqiyati zémin pütünlikini qoghdashni chiqish qilghan, dep aqlidi.

Xitay tashqi ishlar ministirliqining bayanatchisi lyu jyenchawning tekitlishiche, xitayning herbiy xam chotidiki köpiyish herbiylerning turmush shara'iti'ini yaxshilashni meqset qilidiken. Lyu jyenchaw, seyshenbe küni xitay herbiy xam chotining köpiyishini aqlap, "xelq'ara weziyettiki özgürüshler shundaqla döletning birliki we zémin pütünlikini qoghdashni közde tutqanda, jonggoning bir qisim qoral - yaraqlar we eslihelerni sétiwélishke ihtiyaji bar," dédi.

Emma ramsfild ötken shenbe küni sin'gaporda xitaylar herbiy xam chotni téz köpeytip , ilghar qorallarni keng kölemde sétiwalmaqta, dep tekitligen. Ramsfildning bildürüshiche, xitayning herbiy xam choti amérika bilen rusiyidin kéyin dunya boyiche 3 - orunda turidiken.

Emma lyu jyenchaw, "jonggo herbiy xam chotini zor miqtarda ashurush iqtidarigha ige emes," dep körsetti. Uning tekitlishiche, xitay 2004 - yili herbiy sélinmigha 25 milyard dollar xejligen. Emma amérikidiki ilmiy tetqiqat orni rand shirkitining perez qilishiche, xitayning emiliyettiki yilliq herbiy xam choti 69 milyard dollardin 78 milyard dollargha baridiken. (Erkin)