Хитай һәрбий күчини ашурушқа әһмийәт бәрмәктә

Хитай дөләт рәиси һәмдә хитай хәлқ армийисиниң баш қомандани хуҗинтав, һәрқачан һәрбий күрәшкә тәйяр туридиған күчлүк бир деңиз армийиси қурулушини тәләп қилди.

Хитай мәтбуатиниң хәвәр қилишичә, хуҗинтав чаршәнбә күни хитай деңиз армийисиниң йеғиниға қатнашқан коммунист партийиси вәкиллиригә, хитайниң бир деңиз дөлити икәнликини шуниң үчүн деңиз армийисини тәрәққи қилдуруш керәкликини билдүргән.

Хитай азадлиқ армийә гезитиниң билдүрүшичә, хуҗинтав йеғиндики сөзидә": биз һәрбий күрәшкә тәйярлиқ қилишимиз һәмдә қораллиқ күчлиримизниң өз вәзиписини һәр қачан тәлтөкүс орундиялайдиғанлиқидин хатирҗәм болушимиз керәк" дегән.

Хитай һөкүмитиниң деңиз армийисиниң күчләндүрүши, хитай билән америка оттурисида мәвҗут боливатқан муһим ихтилапларниң бери болуп, америка , хитайниң деңиз армийисини күчләндүрүши түпәйли асиядики һәрбий тәңпуңлиқниң бузулушидин болупму буниң тәйвәнгә елип келидиған тәсиридин әндишә қилмақта.

Көпчиликкә мәлум болғандәк, хитай һөкүмити, әгәр тәйвән мустәқиллиқини елан қилса, тәйвәнгә һуҗум қилидиғанлиқини тәкитлимәктә.

Лекин бәзи һәрбий мулаһизичиләрниң ейтишичә, хитайниң деңиз армийсни күчләндүрүшидики асаслиқ мәқисити, енергийә тәминат йоллириниң бихәтәрликини капаләткә игә қилиштин ибарәт икән. (Әқидә)