Xitay herbiy xamchot mesiliside amérikini qopalliq bilen eyiblidi

Xitayning birleshken döletler teshkilatidiki wekili sha zukang, peyshenbe küni jenwe shehiride bergen bayanatida, amérika, xitayning herbiy xamchoti mesiliside aghzini yumushi kérek, dédi.

B b s radi'osining, amérika hökümitining künséri köpiyiwatqan xitayning herbiy xamchoti heqqidiki endishiliri toghrisidiki bir su'alini jawablandurghan sha zukang, diplomatiye qa'idilirini bir terepke qayrip qoyup, xitayning nopusi amérikidin besh-alte hesse köp. Amérikining herbiy xamchoti pütün dunya duletlirining herbiy xamchotining yérimigha teng kélidu. Shuning üchün amérika bu mesilide xitayni eyiblimey, aghzini yumup tursa yaxshi bolidu, dégen.

U shundaqla, teywen mesilsidimu nahayti qattiq teleppuzda süz qilip, teywen'ge kim yardem qilishidin qet'inezer, teywen musteqilliqini élan qilsa, xitayning teywen'ge hujum qilidighanliqini bildürgen.

Xitay herbiy xamchotining künséri köpiyiwatqanliqi, amérika hemde xitayning qoshnilirini bi'aram qilmaqta. Bu yil mart iyida xitay xelq qurultiyi hökümetning 2006 ‏- yilliq herbiy xamchotini 7,14 pirsent köpeytish pilanini maqullidi.

Gerche xitayning 2006‏- yilliq herbiy xamchoti amérikiningkige sélishturghanda, nahayiti az körünsimu, emma amérika mudapi'e minstirliqi, xitayning herbiy xamchotining, xitay hökömiti teripidin élan qilin'ghandin ikki-üch hesse köp ikenlikini bildürmekte. Xitay hökümiti 2006‏- yilliq herbiy xamchotini 35 milyard dollar körsetken. Amérikining bir yilliq herbiy xamchoti bolsa, 419 milyard dollargha yétidu. (Qanat)