Wén jyabaw, jenubiy asiyadiki ziyaritide dalay lama we chégra mesilisini muzakire qilidu

Tibetlerning rohaniy dahiysi dalay lama shundaqla xitay - hindistan otturisidiki chégra mesilisi, aldimizdiki hepte ichide hindistan qatarliq jenubiy asiya ellirini ziyaret qilidighan xitay bash ministiri wén jyabawning ziyaret küntertipidiki muhim témilarni igileydu.

Roytérs axbarat agéntliqining xewer qilishiche, xitayning mu'awin tashqi ishlar ministiri wu dawéy , wén jyabawning ziyaret jeryanida dalay lama mesilisini muzakire qilidighanliqini ashkarilighan. U, "biz hindistan hökümitige dalay lama we uning egeshküchilirining hindistan térritoriyiside xitaygha qarshi bölgünchilik pa'aliyiti bilen shughulliniwatqanliqini otturigha qoyimiz," dédi. Hindistan, béyjing hökümiti teripidin bölgünchilik bilen eyibliniwatqan tibet sergerdan hökümitining bazisi.

Wu dawéyning bildürüshiche, hindistan tibet herikitining hindistandiki pa'aliyitini cheklesh toghrisida bezi wedilerni bergen. U, " biz hindistan hökümitining wedisini qandaq bija keltürüdighanliqigha qaraymiz," dédi.

Wu dawéy, chégra mesilisining hindistan - xitay otturisida bashqa sahelerdiki hemkarliqqa tesir yetküzmeydighanliqini bildürgen. U, " ikki döletning chégra mesilisidiki ixtilapi intayin chong shundaqla mesilisini hel qilish asan'gha toxtimaydu," dep körsetti.

3200 Kilométir uzunluqtiki xitay - hindistan chégra majirasi, ikki dölet otturisida hindistanning meghlubiyiti bilen axirlashqan 1962 -yildiki chégra toqunushini keltürüp chiqarghan. Wén jyabawning jenubiy asiya elliridiki ziyariti seyshenbe küni pakistandin bashlinidiken. (Erkin)