Хитай билән һиндистан икки дөләт чегрисида 27 йеңи сода еғизи ачмақчи

Бейҗиң даирилириниң ашкарилишичә, хитай дөләт рәиси ху җин\тав бу йил 11 - айда һиндистанни зиярәт қилип, һиндистан һөкүмити билән бир қатар келишим имзалайдикән. Һәр иккила тәрәп һазирғичә ху җинтавниң ноябирда елип баридиған зияритиниң тәпсили деталлирини елан қилмиди. Лекин хитайниң һиндистандики баш әлчиси сүн йиши, һиндистан ахбарат агентлиқиға ху җинтавниң зиярити икки дөләт мунасивитини күчәйтидиғанлиқини билдүргән.

Мәтбуатлар, хитай билән һиндистанниң икки дөләт чегрисида 27 йеңи сода еғизи ачидиғанлиқини хәвәр қилмақта. Лекин бу сода еғизлириниң қайси җайларда ечилидиғанлиқи һазирчә мәлум әмәс.

Хитай мәтбуатлириниң хәвәр қилишичә, алдинқи йили уйғур аптоном райониниң рәиси исмаил тиливалди һиндистанни зиярәт қилғанда кәшмир билән үрүмчи арисида һава қатнишини йолға қоюш мәсилиси үстидә музакирә елип барған.

Һиндистан билән хитай арисидики зимин ихтилапи 1962 - йилдики чегра тоқунушини кәлтүрүп чиқарған иди. Сүн йиши, бу йил 7 - айда ечилған һималая чегра еғизи икки дөләт мунасивитиниң күчүйиватқанлиқини көрситиду, дәп тәкитлигән болсиму, лекин бейҗиң билән йеңи деһли арисидики чегра ихтилапи һазирғичә һәл болмиди.

Һиндистан кәшмирдики 38 миң кувадират километир зиминимиз хитай бесивалған, дәп әрз қилса, бейҗиң һиндистан 90 миң кувадират километир зиминимизни аруначал прадәш шататиға қетивалди, дәп дава қилмақта. (Әркин)