Xitay bilen hindistan ikki dölet chégrisida 27 yéngi soda éghizi achmaqchi

• 
  2006-09-04

Béyjing da'irilirining ashkarilishiche, xitay dölet re'isi xu jin\taw bu yil 11 - ayda hindistanni ziyaret qilip, hindistan hökümiti bilen bir qatar kélishim imzalaydiken. Her ikkila terep hazirghiche xu jintawning noyabirda élip baridighan ziyaritining tepsili détallirini élan qilmidi. Lékin xitayning hindistandiki bash elchisi sün yishi, hindistan axbarat agéntliqigha xu jintawning ziyariti ikki dölet munasiwitini kücheytidighanliqini bildürgen.

Metbu'atlar, xitay bilen hindistanning ikki dölet chégrisida 27 yéngi soda éghizi achidighanliqini xewer qilmaqta. Lékin bu soda éghizlirining qaysi jaylarda échilidighanliqi hazirche melum emes.

Xitay metbu'atlirining xewer qilishiche, aldinqi yili Uyghur aptonom rayonining re'isi isma'il tiliwaldi hindistanni ziyaret qilghanda keshmir bilen ürümchi arisida hawa qatnishini yolgha qoyush mesilisi üstide muzakire élip barghan.

Hindistan bilen xitay arisidiki zimin ixtilapi 1962 - yildiki chégra toqunushini keltürüp chiqarghan idi. Sün yishi, bu yil 7 - ayda échilghan himalaya chégra éghizi ikki dölet munasiwitining küchüyiwatqanliqini körsitidu, dep tekitligen bolsimu, lékin béyjing bilen yéngi déhli arisidiki chégra ixtilapi hazirghiche hel bolmidi.

Hindistan keshmirdiki 38 ming kuwadirat kilométir ziminimiz xitay bésiwalghan, dep erz qilsa, béyjing hindistan 90 ming kuwadirat kilométir ziminimizni arunachal pradesh shatatigha qétiwaldi, dep dawa qilmaqta. (Erkin)