Xitay hökümiti öktichi ping mingge muddetsiz qamaq jazasi berdi

Xitayning sichüen ölkisi wuxen sheherlik ottura sot mehkimisi charshenbe küni xitaydiki ataqliq öktichi pa'aliyetchisi pingmingni muddetsiz qamaq jazasigha höküm qildi.

Pingmingning singlisining radi'omizgha bildürüshiche, wuxen sheherlik ottura sot uni " térrorluq pa'aliyetlerni teshkillesh we yéteklesh" jinayiti bilen eyiblep, muddetsiz qamaq jazasi bergen hemde uning siyasiy hoquqini ömür boyi élip tashlighan.

Xitayning eyibnamiside, ping ming 2001 - yilidin bashlap intérnétte maqale élan qilip, shundaqla "démokratiye qurulushi" dégen kitabni yézip, qoral küchi bilen kompartiye hakimiyitini örüp tashlashni teshwiq qilghan dep körsitilgen. Uningda yene, pingming bashqilarni ishqa sélip hökümet emeldalirini görüge élishqa urunup meghlup bolghan déyilgen.

Pingmingning hökümi élan qilin'ghanda, uning adwokati we a'ilisidikiler yénida bar bolup, hökümdin kéyin u özining qayta yuqirigha erz sunmaydighanliqini bildürgen. Chünki pingmingning qarishiche, xitay ediliye da'irilirining uni bérmidin xitaygha qayturup kélishi qanunsiz bolup, uni qarilaydighan seweblirimu yiterlik emes, sot jeryanimu muwapiq emes, ularning adilliqidin éghiz échish mumkin emes iken.

Igilishimizge qarighanda, ping ming xitaydiki ataqliq öktichi pa'aliyetchi bolup, u ilgiri béyjingde "xitay tereqqiyat birleshmisi" ni qurghan. Uning yene xitayda siyasiy tüzülme islahati élip bérish heqqide özgiche köz qarashliri bar iken. (Arzu)