خىتاي ، خوڭكوڭدىكى دىموكراتىك زاتلارنىڭ شاڭخەينى زىيارەت قىلىشىنى رەت قىلدى

خىتاي دائىرىلىرى ، خوڭكوڭ پارلامېنتىدىكى دىموكراتىك زاتلارنىڭ بىرى بولغان لۇ جىگۋاڭنىڭ خىتاي چوڭ قۇرۇقلىقىغا كىرىشىنى رەت قىلدى .

خىتاي چىگرا باشقۇرۇش دائىرىلىرى ، لۇ جىگۋاڭنى شەنبە كۈنى شاڭخەي ئايدۇرۇمىدىن قايتۇرىۋەتكەن .لۇ جىگۋاڭ بېيجىڭ دائىرىلىرىگە قارشى خوڭكوڭدىكى ئۆكتىچى سىياسى پارتىيە - دىموكراتلار پارتىيەسىنىڭ پارلامېنت ئەزاسى . لۇ جىگاڭنىڭ خوڭكوڭغا قايتىپ كەلگەندىن كېيىن بىلدۈرۈشىچە ، خىتاي چىگرا باشقۇرۇش دائىرىلىرى لۇ جىگۋاڭغا ئۇنىڭ خىتايغا كىرىشى چەكلەنگەنلىكىنى بىلدۈرۈپ ، ئۇنىڭ خىتايغا كىرىشى پايدىسىز دەپ قارايدىغانلىقىنى بىلدۈرگەن . لۇ جىگۋاڭ ، خوڭكوڭدىكى ئىجدىمائى پائالىيەتچىلەرنىڭ خىتاي چوڭ قۇرۇقلىقىدىكى تەكشۈرۈش پائالىيىتىگە قاتنىشىش ئۈچۈن ماڭغان ئىدى .

دىموكراتلار پارتىيەسى ۋەقەدىن كېيىن بايانات ئېلان قىلىپ ، خىتاي مەركىزى ھۆكۈمېتى خوڭكوڭ ئالاقىلىشىش باشقارمىسىنىڭ ئىلگىرى لۇ جىگۋاڭ خىتايغا بارىمەن دىسە بولىدۇ دىگەنلىكىنى ئېلان قىلدى . خوڭكوڭدىكى پارلامېنت سايلىمىغا ئىككى ھەپتە قالدى . مۇتلەق كۆپچىلىك كۈزەتكۈچىلەر ، خوڭكوڭلىقلارنىڭ بۇ قېتىمقى سايلامنى خوڭكوڭ دىموكراتىيەسىنىڭ كۈچىنى ئۆلچەيدىغان سىناق دەپ قاراۋاتقانلىقى ، بېيىجىڭنىڭ قوللىشىدىكى خوڭكوڭ مەمۇرى رايون ئەمەلدارى دوڭ جىيەنخۋا ئۈچۈنمۇ سىناق بولۇپ قالىدىغانلىقىنى ئىلگىرى سۈرمەكتە . خوڭكوڭ ئىختىسادىنىڭ يېقىنقى يىللاردىن بېرى ئارقىغا چېكىنىشى دوڭ جىيەنخۋانىڭ خەلق ئىچىدىكى ئابرويىغا تەسىر يەتكۈزگەن . خوڭكوڭلىقلار بۇ يىل 7 - ئايدا نەچچە ئون مىڭ كىشىلىك نامايىش ئۆتكۈزۈپ ، مەركىزى ھۆكۈمەتنىڭ 2007 - يىلغىچە خوڭكوڭدا ئومۇمى سايلام ئېلىپ بارمايدىغانلىقىنى ئەيىپلىگەن ئىدى . (ئەركىن)