Xu jintaw xongkongda démokratik saylam élip bérish waqit jediwili bermidi

Xitay dölet re'isi xu jintaw seyshenbe küni xongkong walisi zing yingchüen bilen béyjingda uchriship, xongkonggha démokratiyining qedemmu - qedem kélishini telep qildi.

Xongkong parlaménti ötken hepte zing yingchüenning béyjing hökümiti qollighan islahat pilanini ret qilghandin kéyin, xu jintaw seyshenbe küni béyjingda xongkong walisigha her qandaq özgirish tedriji élip bérilishi kérek, dédi. Söhbet jeryanida xu jintaw, béyjing hökümitining zing yingchüenni dawamliq qollaydighanliqini bildürgen. Fransiye axbarat agéntliqining xewer qilishiche, xu jintaw béyjing hökümiti xongkongda démokratiye tereqqiyatini qollaydu, dégen. Emma u, " her qandaq dölet we rayonning démokratiye tereqqiyati tedriji tarixiy jeryanigha ige. Xongkong démokratiyisining tereqqiyatimu muqim, toghra usul we séstimiliq yollar bilen élip bérilishi kérek" deydu. Zing yingchüenning islahat pilani ötken hepte xongkong parlaménti teripidin ret qilindi. Xongkong parlaméntidiki démokratik küchler zing yingchüenning pilanini yiterlik emes we omumi saylam waqit jediwili otturigha qoyulmighan, dep tenqid qilghan.

Bu arida béyjing hökümiti xongkong puqralirining zor kölemlik naraziliq namayishlirigha duch kelmekte. Puqralar bu ayning bashliri nechche on ming kishilik namayish ötküzüp, béyjing hökümitidin xongkongda omumi saylam élip bérish waqit jediwili élan qilishni telep qilghan. Bu zing yingchüenning xongkong walisi bolup teyinlen'gendin béri tunji qétim béyjinggha bérishi bolup hésablinidu. (Erkin)