Вен җябав хоңкоңлуқларни мәсилини бирликтә һәл қилишқа чақирди


2005.12.28

Хитай баш министири вен җябав җуңнәнхәйдә хоңкоң алаһидә мәмурий район башлиқи зең йиңчүәнниң зияритини қобул қилғанда, хоңкоңда йәнила чоңқур йилтиз тартқан ихтилап вә мәсилиләрниң мәвҗут икәнликини, буни хоңкоңлуқларниң бирликтә һәл қилиши керәкликини билдүрди.

Зең йиңчүәнниң бейҗиңдики бу зиярити, у мәмурий район башлиқлиқиға тәйинләнгәндин буян хитайға қилған тунҗи сәпири. Вен җябав униң тәхткә чиққан йерим йилдин буянқи хоңкоңниң иқтисадий тәрәққиятиға қошқан төһпилирини тәрипләш билән биргә, хоңкоңда һәл болмиған мәсилиләрниң мәвҗутлиқини әскәртти. У йәнә, хоңкоң һөкүмити вә хәлқиниң пүтүн күчи билән иқтисадий тәрәққиятни илгири сүрүп, җәмийәт муқимлиқини сақлашқа алаһидә әһмийәт беришини тәләп қилди.

Хоңкоң парламенти өткән чаршәнбә күни бейҗиң һөкүмити қоллиған сиясий түзүлмә ислаһат лайиһисини қобул қилмиған болуп, бу зең йиңчүән үчүн бир чоң синақ вә хиҗилчилиқ болди. Шуңа униң бу қетим бейҗиңға берип, хизмитини доклат қилиши кишиләрниң деққитини тартти.

Зең йиңчүән вен җябавдин бурун сәйшәнбә күни хитай дөләт рәиси ху җинтав билән көрүшти һәмдә униң разилиқиға еришти. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.