Xitay rehberliri arisidiki hoquq kürishining muqami yükseldi

Xitay kompartiyisi merkizi komitét 16 - qurultiyining 4 - omumi yighini 9 - ayning 16 - küni échilidu . Fransiye axbarat agéntliqi, xitay merkizi herbiy ishlar kométitining re'isi jang zéminning partiye ichide qattiq bésimgha uchrawatqanliqi, biraq uning bu qétimqi omumi yighinida herbiy ishlar kométitining re'islikini dawamliq saqlap qélishqa tirishidighanliqini xewer qildi .

Fransiye axbarat agéntliqining partiye ichidiki ismini ashkarilashni xalimaydighan erbaplarning sözini neqil keltürüshiche , bu yil 78 yashtiki jang zéminning déng shawpingdek siyasi birodiki da'imiy hey'etlik wezipisidin ayrilghandin kéyin herbiy ishlar kométitining re'islikini ötküzüp bérish niyiti yoqken .

Partiye ichidiki weziyettin xewerdar erbabllar , jang zéminning herbiy komitét re'islikidin asanliqche waz kechmeydighanliqini, hetta uning 2005 - yili chaqirilidighan merkizi komitét 5 - omumi yighinidimu hoquq tapshurushigha kapaletlik qilghini bolmaydighanliqini ilgiri sürgen. Bu arida igiligen xewerlerge qarighanda xitay merkizi herbiy ishlar komtétining mu'awin re'isi gu boshiyong, yéqinda Uyghur éli we gensulardiki xitay qoralliq qisimlirini közdin kechürgende jang zéminni ashkare qollighan. Teywen metbu'atlirining xewer qilishiche, gu boshyong qoralliq qisimlarni herqandaq waqit we herqandaq ehwalda herbiy ishlar komtéti we jang zéminning qomandanliqigha boy sunushqa chaqirghan. Biraq xitayning hökümet zuwani shinxu'a axbarat agéntliqi , gu boshiyongning Uyghur éli we gensudiki qisimlargha sözligen nutuqidiki uchke wekillik qilish neziriyesini öginish, jang zéminning qomandanliqigha boy sunush heqqidiki sözlirini qisqartip élan qilghan. (Erkin)