Кишилик һоқуқ тәшкилати ширакни хитайға бесим ишлитишкә үндиди


2004.10.11
Share on WhatsApp
Share on WhatsApp

Франсийә президенти ширак (Jachques Chirach) хитайда зиярәттә боливатқан мәзгилдә, баш шитаби париждики хәлқара кишилик һоқуқ тәшкилати болған " чеграсиз мухбирларни қоғдаш тәшкилати" дүшәнбә күни ширакни түрмигә ташланған өктичи вә ахбарат хадими хуаң җиңчюни қоюп бериш һәққидә хитайға бесим ишлитишкә чақирди.

Франсийә ахбарат агентлиқиниң мәлум қилишичә, " чеграсиз мухбирларни қоғдаш тәшкилати" баянат елан қилип, мәзкүр тәшкилатниң франсийә президенти ширакниң бу қетимлиқ зияритидин пайдилинип, хитайдики сөз әркинликини илгири сүрүшини үмит қилидиғанлиқини билдүрди.

Хуаң җиңчю бу йил 30 яшқа киргән болуп, илгири " яңчең гезити" қатарлиқ хитайда чиқидиған нурғун гезит-жорнал вә интернәтләрдә көп қетим мақалә елан қилған. У өткән йили 9- айниң 13 - күни җияңсуда хитай җамаәт хәвпсизлик орунлири тәрипидин мәхпий қолға елинип, кейин "дөләтни ағдурушқа урунуш" җинайити билән 12 йиллиқ қамақ җазасиға һөкүм қилинған. (Пәридә)

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.