Xu jingtaw APEC yighinida bush bilen körüshidu

Xitay dölet re'isi xu jingtaw bu ayning axirliri chilida ötküzülidighan asiya-tinch okyan iqtisadiy hemkarliq teshkilatining bashliqlar yighinida amérika prézidénti jorji bush bilen uchriship, shimaliy koriye yadro qorallar krizisi we teywen mesilisi boyiche söhbet élip baridu. Jüme küni xitay tashqi ishlar ministirlikining mu'awin ministiri jaw wénjong, xu jingtawning 20- we 21 - noyabir künliri chili paytexti santiyagoda ötküzülidighan bashliqlar yighini jeryanidiki dem élish arisida, prézidént bush bilen söhbet élip baridighanliqini élan qildi. Xitay tashqi ishlar ministirlikining mu'awin ministiri shin gofang , prézidént bush bilen xu jingtaw otturisidiki söhbetning meqsiti, amérika - xitay otturisidiki ijabiy hemkarliqni ilgiri sürüsh dep körsetti.

Biraq shin gofang ikki dölet rehbirining némilerni sözlishidighanliqini tilgha almighan. Roytérs axbarat agéntliqi, xu jingtawning amérika prézidéntidin teywen musteqilliq herikitini tosushni telep qilip, bu mesilini xitay - amérika munasiwitining saghlam tereqqiyatidiki tosalghu dep körsitidighanliqini xewer qildi. Jorji bush yéqinda reqibi jon kerréyni meghlup qilip, yene bir qarar prézidént bolush layaqitige érishkendin kéyin , xitay dölet re'isi xu jingtaw uni tebrikligen. Saylamdin bir kün ilgiri xitayning sabiq mu'awin bash ministiri chyen chichin ” jonggo “ Gézitide maqale élan qilip, prézidént bushni dunyagha hökümranliq qilishqa urunush bilen eyibligen idi. (Erkin )