Ху җинтав билән тәйвән өктичи партийисиниң рәһбири суң чуйү көрүшти


2005-05-12
Share

Хитайни зиярәт қиливатқан тәйвән хәлқпәрвәр партийисиниң рәиси суң чуйү пәйшәнбә күни хитай компартийисиниң баш секритари вә дөләт рәиси ху җинтав билән учрашти.

Америка бирләшмә ахбарат агентлиқиниң хәвиригә қариғанда, хуҗинтав сөһбәттә, суң чуйүниң тәйвән мустәқиллиқиға қарши турғанлиқиға юқири баһа бәргән. У йәнә, әгәр тәйвән президенти чин шүйбйән " бир хитай" принсипини қубул қилса, униң билән сөһбәт өткүзүшни халайдиғанлиқини оттуриға қойған.

Хитай чоң қуруқлуқи билән бирлишишни яқилайдиған тәйвән хәлқпәрвәр партийисиниң рәиси суң чуйү хитайни зиярәт қилғандин бери, тәйвәнниң мустәқиллиқини қоллимайдиғанлиқини билдүрмәктә һәмдә бейҗиңни тәйвәнгә қаратқан һәрбий тәһдидни бикар қилип, иқтисадий вә башқа тәрәпләрдин алақини күчәйтишкә чақирмақта.

Хәвәргә қариғанда, хитай дөләт мәтбуатлири суң чуйүниң зияритигә алаһидә әһмийәт берип, из қоғлап хәвәр бәргән. Суң чуйү бу айниң ичидә хитайни зиярәт қилған тәйвәндики иккинчи бир өктичи партийиниң рәһбири болуп һесаблиниду.

Буниң алдида тәйвән гоминдаң партийисиниң рәиси лйән җәнму хитайни зиярәт қилған иди. Хитай һөкүмити тәйвән өктичи партийә рәһбәрлириниң зиярити арқилиқ, тәйвән президенти чин шүйбйәнни ялғуз қалдуруш вә икки қирғақ мунасивитини яхшилаш һәққидә униңға бесим ишлитишни үмид қилмақта.

Бирақ, америка дөләт мәҗлиси кеңәш палатасиниң әзаси дәйәнна фәнситенниң чаршәнбә күни билдүрүшичә, хитай билән тәйвәнниң мунасивити, тәйвәндики икки өктичи партийә рәһбириниң хитайни зиярәт қилиши билән өзгирип қалмайдикән. Америка тәйвән боғези мунасивитидә йәнила муһим рол ойнайдиған болуп, америкиниң мәйдани икки қирғақниң һазирқи һалитини сақлап қелиш икән. (Арзу)

Пикирләр (0)

Барлиқ пикир - баянларни көрүш.

Пикир қошуң

Радиониң ишлитиш шәртлиригә асасән, пикирлириңиз тәкшүргүчиләр тәрипидин тәстиқлиниши вә мувапиқ дәриҗидә тәһрирлиниши түпәйли, тор бәттә дәрһал пәйда болмайду. Сиз қалдурған мәзмунға әркин асия радиоси җавабкар болмайду. Башқиларниң көз қариши вә һәқиқәткә һөрмәт қилишиңизни сораймиз.

Толуқ бәт