Ху җинтав генералларни өстүрди

Ху җинтав җаң земинниң қолидики һәрбий һоқуқни тапшурувелип, хитай һәрбий ишлар комитетиниң рәисликигә бекитилгәндин бир йил өткәндин кейин тунҗи қетим 10 нәпәр адәмгә хитай армийисиниң әң юқири дәриҗилик һәрбий унвани- генерал полковниклиқ унвани бәрди.

Хитайниң шинхуа агентлиқиниң учуридин мәлум болушичә, ху җинтав һәрбий унван берилгән юқири дәриҗилик генералларни өзи биваситә қобул қилған һәм гуваһнамини тапшурған.

Һазир хитай азадлиқ армийисиниң 164 нәпәр генерал полковники бар болуп, 1988-йили һәрбий унван бериш әслигә кәлтүрүлгәндин кейин юқири дәриҗилик генераллар үч дәриҗигә йәни гәнәрал поковник, генерал лейтинант вә генерал майорға бөлүнгән шуниңдәк генерал полковниклар биринчи дәриҗилик генерал полковник һәм генерал полковник дәп айрилған болсиму, кейин бу әмәлдин қалдурулған.

Хитай армийиси тунҗи қетим 1955-йили һәрбий унван түзүмини йолға қоюп, мав зедуң 10 адәмгә маршаллиқ, 10 адәмгә гәнәрал армийә унванини бәргән иди. Әнә шу чағда сабиқ шәрқий түркистан җумһурийитиниң миллий армийисиниң полковниклиридин зунун тейипоп, мәмәт имин иминоп, майор заһир савданоп, полковник мәрғуп исһақоп қатарлиқларға генерал майорлуқ унвани, һәрбий иштин хәвири йоқ дәп қаралған сәйфиддин әзизгә улардин бир дәриҗә юқири генерал лейтинатлиқ унвани берилгән иди.

Йеқинқи йилларда йәнә қурбан әршидин қатарлиқ бир қанчә уйғурға төвән дәриҗилик генерал майорлуқ унвани берилгән болуп, бу уйғур генераллири хитай армийисидә пәқәт, дивизийә командири һәм муавин қоманданлиқ вә муавин сиясий комиссарлиқ вәзипилирини ақтурған.(Үмидвар)