Xu jintawning ziyariti harpisida amérikidiki xitaygha qarshi teshkilatlar naraziliq pa'aliyetliri ötküzüshke teyyarliq körmekte

Xitay dölet re'isi xu jintaw , 18 ‏- april künidin 21 ‏- künigiche amérikida ziyarette bolmaqchi, mütexessisler xu jintawning ziyariti arqiliq amérika ‏- xitay munasiwitide alahide bir özgirish bolmaydighaniqini bildürmekte. Bu arida yene, xitay hökümitige qarshi her qaysi öktichi teshkilatlar xu jintawning amérikidiki ziyariti mezgilide élip baridighan bir qatar pa'aliyetliri üchün hazirliq körmekte.

Xitay dölet re'isi xu jintawning amérika ziyariti, chet'ellerde xitay kommunistik partiyisining tüzümige qarshi pa'aliyet élip bériwatqan her qaysi öktichi teshkilatlar üchün, öz naraziliqini bildürüshtiki yaxshi bir purset hésablandi.

Xu jintawning amérika ziyariti , amérikida yashawatqan Uyghurlarning naraziliqini qozghash bilen birge, Uyghurlar, xuning ziyariti amérika xelqige özlirining kishilik hoquqining xitay hökümiti teripidin depsende qiliniwatqanliqini yene bir qétim anglitishi üchün meydan hazirlidi dep qarashmaqta.

Amérika Uyghur birleshmisining re'isi nuri türkel ependi , xu jintawning ziyariti heqqide toxtaldi. Uyghurlardin bashqa amérikidiki teywen müsteqilliq terepdarlirimu , xu jintawning amérika ziyariti dawamida pa'aliyetler uyushturghan bolup, amérikidiki teywen jem'iyet ishliri teshkilatining diriktori ziyaritimizni qobul qildi:

“Biz , xu jintawning bu qétim , amérikida élip baridighan ziyaritidin paydilinip, amérikining washin'gton shehiridiki laféyet baghchisida yighilish pa'aliyiti ötküzüp, asasliq xitayning qoral bilen teywenni boysundurush gherizige bolghan naraziliqimizni bildürmekchi.”

Mezkür teshkilatning diriktori sözide yene, xitayning démokratiye we kishilik hoquq prinsiplirigha éghir derijide xilapliq qiliwatqanliqini bildürdi.