Ху җиңтав сәуди әрәбистанни зиярәт қилиду

Хитай ташқий ишлар министирлиқи хитай дөләт рәиси ху җинтавниң 18 - априлдин 21 - априлғичә америкида елип баридиған зияритини ахирлаштурупла сәуди әрәбистанни зиярәт қилидиғанлиқини елан қилди.

Хитай ташқий ишлар министирлиқи баянатчиси лю җйәнчавниң сәйшәнбә күнидики мухбирларни күтүвелиш йиғинида әскәртишичә, ху җинтавниң зиярити 22- априлдин 24 - априлғичә давамлишидикән. У, "мениңчә енергийә һәмкарлиқ бизниң һәмкарлиқимиздики муһим саһә, лекин бирдин ‏- бир саһә әмәс " дәйду. Хитай америкидин қалса дуня бойичә 2 - чоң нефит истимал қилғучи дөләт болуп, у өткән йили 130 милйон тонна хам нефит импорт қилған. Буниң 20 милйон тоннисини сәуди әрәбистандин сетивалди. Сәуди әрәбистан падишаһи абдулла бу йил 1 - айда тунҗи қетим хитайни зиярәт қилип, хитай билән нефит, тәбий газ вә менирал маддилар записи бойичә бир қатар келишимләр имзалиған.

Франсийә ахбарат агентлиқи сәуди әрәбистанлиқ иқтисадшунасларниң " сиясий җуғрапийилик нүқтидин алғанда, сәуди әрәбистан ислам дуняси, әрәб дөләтлири вә парис қолтуқи районида тәсири чоң дөләт", бу бейҗиң үчүн муһим әһмийәткә игә, дәп қарайдиғанлиқини хәвәр қилди. Лекин шуниң билән биргә "сәуди әрәбистан көп тәрәпләрдә хитайға еһтияҗи бар дөләт " дәп қаралмақта. Көзәткүчиләрниң әскәртишичә, хитай һөкүмити сәуди әрәбистандики уйғурларни шәрқий түркистан тәшкилатлирини пул билән тәминләйдиған муһим мәнбә, дәп қарайду вә сәуди даирилириниң буни чәкләйдиған тәдбир елишини үмид қилидикән.